Ilulissani ukiorpasuarni akerariinneq unitsinniarneqalerpoq
Timersoqatigiiffiit marluk taakkua siulersuisui sapaatip-akunnerata massuma ingerlanerani ataatsimiissimapput, akerariinnerup qaangerniarneqarnissaanut suliniutit matumani aallartisarniarneqarlutik. Atuagagdliutini tamanna atuarneqarsinnaavoq.
Timersoqatigiiffiit akornanni akeqqersimaarnerit ima sakkortutigaat allaat meeqqanut siaruaassimalluni:
- Meeqqat ilaatigut qiasarsimapput aammalu pissutsit toqqissisimanartikkunnaarsimallugit, Nagdlúnguami siulittaasoq Lena Ravn Davidsen oqarpoq, oqaasiilu I-69-imit tapersersorneqarput:
- Meeqqat ilaatigut eqqarsartalersimagaluarput klubbeqatigiinngikkaanni ikinngutigiittoqarsinnaanngitsoq, I-69-ip allatta Bent Petersen Atuagagdliutinut oqarpoq.
Nagdlúnguup I-69-illu akornanni akeqqersimaarneq oqaasiinnartigut aamma malunniuttarsimanngilaq, allaammi sungsiusaatigalugu unamminissamut klubbit taakku marluk imminnut ungasittorujussuupput:
- Allatut ajornartumik arsaattartuvut Qeqertarsualiartariaqartarput sungiusaammik unammisinnaajumallutik. Tamanna aningaasarpassuarnik piffissamillu naleqarpoq, Lena Ravn Davidsen oqarpoq.
Timersoqatigiit Kattuffiat akuliutsinneqartariaqarsimavoq
Timersoqatigiiffiit akornanni akeqqersimaarnerit ukiualunni atuussimavoq, Timersoqatigiillu Kattuffiat siorna 2014-imi akuliunneqartariaqarsimalluni:
- Ataatsimiinnerilli kingorna eqqissivittoqanngilaq, Timersoqatigiit Kattuffiisa qullersaat Carsten Olsen oqarpoq.
Nagdlúnguamili siulersuisut akeqqersimaarnerit ikinngutigiinnermut saatsinniarnissaannut Nagdlúnguup ileqquusumik ukioq manna ataatsimeersuarnerani suliakkinneqarput. Klubbillu taakku marluk sapaatip-akunnerata siuliani naapillutik kaffisoqatigiipput:
- Ataatsimiinneq iluatsilluarpoq siunissarlu isumalluarnartorujussuuvoq. Maanna katerisimaartarnerit aallartinniarlugit isumaqatigiippugut klubbinit tamaginnit meeqqaniit inersimasunut peqataaffigineqartussat, Lena Ravn Davidsen Atuagagdliutinut taama oqarpoq.
Timersoqatigiillu Kattuffiata tamanna nuannaarutigaa:
- Klubbit marluk akornanni pissusilersorfigeqatigiinneq illloqarfiup sinnerani inuit akornanni pissusilersorfigeqatigiinnernut tuniluuttarpoq. Pingaaruteqarpoq akeqqersimaarfigeqatigiinngikkaluarluni unammillertigiittoqarsinnaanera, Timersoqatigiit Kattuffiata qullersaa Carsten Olsen oqarpoq.
Lena Ravn Davidsenip Ilulissani klubbit akornanni akeqqersimaarnerit qaangerniarneqarnerannut atatillugu periutsit illoqarfinni allani timersoqatigiiffinnut akeqqersimaarfigeqatigiittunut inassutigerusuppai.
