Lastbiilit manngertornillit, nappartakut sorsunnersuullu kinguneranit eqqagassat: Tassa ornigarneqaatissat
Nunatta kangiani sorsunnersuup aappaata nalaani sakkutooqarfiusimasoq katersugaassivinngorsinnaavoq.
Ikkattimik taaneqartartumi sorsunnersuup nalaani eqqaavissuatut isikkulimmik Amerikamiut eqqagassarpassuarnik qimatsinikuupput.
Ilaatigut uulianut nappartat, lastbiilit atortuillu oqimaatsut sorsunnersuup nalaani qimaannarneqarsimapput.
AAMMA ATUARUK Ikkattimi qimanneqarsimasut salinneqaleruttorput
2019-mili Kommuneqarfik Sermersuup sakkutooqqarfikumik saliisoqarnissaa akisussaaffigisimavaa. Massakkullu tamarmik piiarneqarnngikkaluarlutik sumiiffik taanna takornarianut kommunimit ornigarneqaatinngortinneqarusuppoq.
Kommunip aningaasaqarnermut inuussutissalerinermullu ataatsimiititaliaata tamanna massakkut tusarniaassutigineqarpoq.
Siunnersuutimut oqaaseqarnissaq akerliliinissarluunnit pingasunngornermi juulip 21-iata tungaanut periarfissaavoq.
Saliinissamut 2018-mili isumaqatigiissuteqartoq
Ikkatteq oqaluttuarisaanermut atassuteqarpoq, najugaqavissuniit takornarianiilllu ornigarneqaatigineqarlunilu aliannaarsaarfigiartorneqartartoq kommuni allappoq.
Taamaattumik salinneqavinngikkaluarluni tamanna silami katersuugaasivinngortinneqarsinnaavoq.
Sakkutooqqarfikup qimanneqarnikup ilaa atatiinarneqarsinnaaneranik siunnersuutigineqarpoq. Tamaani unnuisarfiliortoqarsinnaaneranik. Tamaanilu isumannaatsumik angalaarfiusinnaaneranik. Sakkutooqarfiullu oqaluttuarisaaneranut tunngasunik allagartanik nivinngaasoqarsinnaalluni.
AAMMA ATUARUK Sakkutooqarfiusimasuni saliginissat aallartilerput
Naalakkersuisut Siulittaasuat Kim Kielsen aamma Danmarkimi Avatangiisinut Inuussutissanullu Ministeriusimasoq Esben Lunde Larsen januarimi 2018-imi politikkikkut isumaqatigiissuteqarput, Kalaallit Nunaanni Amerikamiut qimaannagaannik saliinissamut tunngasumik.
Kommuneqarfik Sermersuup siunnersuut akuerissappagu, Ikkattimi saliisoqassanngilaq.
Avatangiiseq qanoq sunnerneqartigissanersoq apeqqutaasoq
Nappartarsuit angallatillu manngertinnikut sumiiffimmi mingutitsilaavissoreerput . Tamanna inuit peqqissusaanut atugarissaarneranullu sunniuteqangaatsiarsinnasoq kommuni allappoq.
- Taamaammat saliinermi illersuutissanik naammattunik aaqqiissuteqartoqartariaqarpoq. Pingaartumik pingaarnertut sanaartorfiusup avannaata kitaani tamanna atuuppoq, asbestinik flisit amerlasoorpassuit tamaaniimmata, siunnersuummi allaqqavoq.