Ikkattimi qimanneqarsimasut salinneqaleruttorput

Ikkattimi Amerikamiut mittarfigisimasaani sakkutuut eqqagaat qimaannakkat saviminikut piiarneqaleruttorput. Saliineq ukiuni arlalinni sivisussuseqassangatinneqarpoq. Tassami nappartat qimaannakkat ikinnerpaamik 200.000-it missaaniissangatinneqarput.
Saliineq ukiuni arlalinni sivisussuseqassangatinneqarpoq. Tassami nappartat qimaannakkat ikinnerpaamik 200.000-it missaaniissangatinneqarput. Assi © : Rasmus Chr. Rasmussen
Saliisitsineq suliffeqarfimmit 60 North Greenland-imit Qaqortumi angerlarsimaffeqartumit ingerlanneqarpoq. Inuit qulit sinnerlugit Ikkattimi ulluni makkunani saliipput. Assi © : Rasmus Chr. Rasmussen
Ikkattimi mittarfikup eqqaani nappartarpassuit orsussaasiviusimasut, illorsuakut, angallassissutaasimasullu qimanneqarsimasut salinneqaleruttorput. Eqqakkallu qimatat ikigisassaanngillat. Assi © : Rasmus Chr. Rasmussen
Allattoq Virna Kromann
septembarip 04-at 2019 16:43

Sorsunnersuup aappaanni Atlantikoq qulaallugu timmisartuussinermut atugassatut ilaatigut tunumi Ikkatteq Nuullu eqqaani Marraq amerikamiunit mittarfittut pilersinneqarput.

Ikkattimi mittarfikup eqqaani nappartarpassuit orsussaasiviusimasut, illorsuakut, angallassissutaasimasullu qimanneqarsimasut salinneqaleruttorput. Eqqakkallu qimatat ikigisassaanngillat.

- Nappartakut 10.000-it missaat katersorsimalerpagut, eqqoriakannersinnaavaralu nappartat suli 190.000-niit 200.000-it tungaanuussasut, taamaammat suli suliassaqaqaagut, Kommuneqarfik Sermersuup Pinngortitamut Piujuartitsinermullu Immikkoortortaqarfiani aqutsisoq, Frank Rasmussen oqarpoq.  

Naalakkersuisut Siulittaasuat Kim Kielsen aamma Danmarkimi Avatangiisinut Inuussutissanullu Ministeriusimasoq Esben Lunde Larsen januarimi 2018-imi politikkikkut isumaqatigiissuteqarput, Kalaallit Nunaanni Amerikamiut qimaannagaannik saliinissamut tunngasumik.

Isumaqatigiissummut atatillugu Danmarkip 180 millionit koruunit immikkoortippai ukiut arfinillit ingerlaneranni amerikamiut qimaannagaanut saliinernut atugassatut.

- Aningaasat amerikamiut eqqakkanut qimaannagaannut saliinissamut atorneqassapput soorlu Ikkattimi, Marrarmi allanilu loranstationiusimasuni maani kommunitsinni kommuninilu allani Kalaallit Nunaaniittuni, Frank Rasmussen oqarpoq.

Saliisitsineq suliffeqarfimmit 60 North Greenland-imit Qaqortumi angerlarsimaffeqartumit ingerlanneqarpoq. Inuit qulit sinnerlugit Ikkattimi ulluni makkunani saliipput.

Saliisut umiarsuarmi Adolf Jensen-imi najugaqartut septembarip qeqqata tungaanut sullitissapput.

- Ukioq manna planerput malillugu septembarip qeqqata tungaanut Ikkatsimiisuugut, taava aapaagu nangeqqinneqarumaarluni. Tassa imaappoq savimineq immaqa 250 tonsi peerneqassaaq taakanngaaniit, saliisunik aqutsisoq, Emil Lyberth oqarpoq.

Ikkatsimi pinngortitami mingutsitsisoqarsimasinnaaneranik misissuisitsinerup ukiup uuma naalernerani naliliiffigineqarnissaa, Frank Rasmussenip naatsorsuutigaa.

Aamma atuaruk