Lars Løkke Rasmussen: Namminersornermi meeqqat inuusuttullu pingaartinneqassapput

- Namminersornerup eqqunneqarnerani siunissamut neriulluarneq imminullu tatiginninneq eqqarsaatigalugit suliassat maanna piviusunngortinneqartariaqarput. Kalaallit Nunaanni periarfissat amerlaqaat. Meeqqat inuusuttullu oqalugiaatinni ilannguppakka, tassaammatami Kalaallit Nunaata siunissai. Meeqqat toqqissisimanartumik peroriartornissaat inuusuttullu ilinniarluarsimanissaat pingaaruteqarnerpaavoq, ministeriuneq Lars Løkke Rasmussen oqarpoq.

Naalagaaffeqatigiinnerup pingaaruteqassusaa taassuma aamma oqaatigaa, Savalimmiormiumik nuliaqarnini eqqaasitsissutigalugu. Kalaallit Nunaanni Danmarkimilu ilaqutariissutsikkut attaveqaatit aamma eqqarsaatigineqartariaqartut, Lars Løkke Rasmussenip oqaatigaa, Naalagaaffeqatigiinnermilu ataqqeqatigiinneq pingaartuunerarlugu.