Lars-Emilip Kielsen paragrafimik isornartorsiunnaaqquaa
![](/sites/default/files/styles/image_934x467/public/article_images/2016.04.08_start_fm16_-_20081.jpg?itok=OwLv3_UJ)
Naalakkersuisunut annikitsumik annertuumilluunniit apeqquteqarpallaartoqartoqarsinnaava? Tamanna siulittaasut marluk isumaqatigiinngissutiginngaatsiarpaat.
Inatsisartunut Naalakkersuisunullu ilaasortat §37-imut apeqquteqartarnerat KNR-ip sapaatip akunnerata siuliani sammivaa. Inatsisartut ukioq manna qaammatit siulliit marluk ingerlaneranni 113-eriarlutik apeqquteqarsimasut atorfillillu taakku ulluni 176-ini akiniarsimagaat nalunaarsuinerup takutippaa.
Tamannalu naalakkersuisunut siulittaasup Kim Kielsenip akuliussutigaa:
- Pissusissamisoorsorinngilara, Naalakkersuisunut apeqquteqarpassuit pillugit oqarpoq.
AAMMA ATUARUK Mange spørgsmål er upassende
Tamat oqartussaaqataanerat akeqartoq
Taama isumaqarneq Inatsisartunut siulittaasup, Lars-Emil Johansenip isumaqatiginnilluinnarpaa.
- Inatsisartoqarneq qinikkallu aqqutigalugit innuttaasut oqartussaaqataanerat soorunami akeqarpoq (…) Siulittaasoqarfik inatsisartoqarnikkut maanna nunatsinni aaqqissuussaanitsinnut sooruna tunuliaqutaavoq, ilaasortallu Inatsisartunut ilaasortatut suliassaminnik ingerlatsinissaannut periarfissaannik killilerniarnagit, Lars-Emil Johnasen oqaaseqaateqarnermini oqarpoq.
AAMMA ATUARUK Inatsisartut Naalakkersuisunut apeqqarissaarput
Kiisalu Kim Kielsenip Naalakkersuisullu sinnerisa tikkuartuiinnaratik suliassat suliarissagaat inassuteqarfigai:
- Siulittaasoqarfiup Naalakkersuisunut kaammattuutigaa tamatumunnga taarsiullugu malittarisassat Inatsisartunit akuersissutigineqarsimasut naapertorlugit akisussaaffitsik tigoqqullugu, ajornartorsiutinut nammineq pilersitaminnut akisussaaffik qimarratiginagu suliassamik naammassiniarneratigut.