Lars-Emil: SF-p qaninniarnera ulorianarpoq
Pinngortitamik uumasunillu illersuiniaqatigiiffiup WWF-ip avatangiisit pillugit ataatsimiititamik sunneeriaraluarneratigut tamanna ilaatigut erserpoq. Taakkua siunnersuutigaat ukiormanna IWC-p ataatsimiinnissaani suleqatigiissitaliortoqassasoq inuit pilersitaannik Issittumi arferit sunnersimaneqarnerannik misissuisussamik. Lars-Emil Johansenip oqaatigaa, siunnersuut taanna Danmarkimi, Nunatsinni Savalimmiunilu naalakkersuisut akornanni oqaluuserineqarsimanngitsoq, naak arfanniarneq pillugu ataatsimiititaliarsuup ataatsimiinnissaani Danmarkip iliuusissai taakkua akunnerminni isumaqatigiissutigereersimagaluaraat.
Nunatta, Savalimmiut Danmarkillu soqutigisaat Ukiuni kingullerni iluatsittumik oqimaaqatigiissaarneqarsinnaasarsimapput, naak EU uumasunillu illersuiniaqatigiit assigiinngitsut tatisiniartarsimagaluaqisut. Tamatumunnga minnerunngitsumik pissutaavoq nunanut allanut tunngasunut ministerit kingulliit, Nunatta soqutigisaanik ilumoorlutik illersuisarnerat - aamma Siumup Socialdemokratinik suleqateqarnermigut arfanniarneq pillugu najoqqutassat folketingimi amerlanerussuteqartunit tapersersorneqarnissaat qulakkeersinnaasarsimammagu.
Piffissaq kingullerpaaq atorlugu WWF siunnersuuteqariasaarpoq Issittumi arfanniarnermut akornutaasumik inuit iliuuserisagaat assigiinngitsut misissoqqissaarneqalissasut, IWC-ip ataani suleqatigiissitaliornikkut. Tassuuna isertukuluttumik pissuseqarluni anguniarneqarsorinarpoq Nunatta imartaani uuliasiorluni qillerinerit maanna ingerlanneqartut IWC sakkugalugu aqqutigalugulu akerlilersorneqarnissaat.
Taamaaliornerat Lars-Emil Johansenip assersuuppaa qanittoq tikillugu Greenpeacip - inatsisinik unioqqutitsilluni - Nunatsinni uuliasiornissamut akuersissuteqartarnermik nakkutilliisunngoriaraluarneranut.
Lars-Emil Johansen tamanna pillugu ima oqarpoq:
- Danmarkimi naalakkersuisut piffissami qanittumi nikinnissaat, maanna ilimanarsilluinnarpoq- naalakkersuisunngortussallu taakku tamatigut tapersersorsinnaagaluarlugit, taamaattoq SF-ikkut apeqqutini taamaattuni uumasunik eqqissisimatitsiniaqatigiinnik qanittumik suleqateqarnerat , tamatumalu Issittumi politikkimut qanoq sunniuteqalersinnaanera aarlerinartoqartippara.
Maluginiarparattaaq SF-ip siulittaasuata Villy Søvndahlip tusagassiutinut oqaaseqarnermini Greenpeace akerlilinngikkaa, tassungalu ilanngullugu maluginiarluguttaaq SF isumaqartoq naalakkersuisutiguunngitsumik suliniaqatigiiffiit Issittoq pillugu Siunnersuisoqatigiinni taaseqataasinnaallutik peqataasinnaalertariaqartut.
- SF-ip suliniaqatigiiffinnut taakkununnga - periutsit demokratimik tunngaveqarnatillu inatsisaatsuliornerusut atorlugit suliniartunut - qaninniarnera Nunatta soqutigisai eqqarsaatigalugit ulorianartutut oqaatigisariaqarpoq, Lars-Emil Johansen naggasiivoq.