Lars Emil Johansenip nammineq oqarnera malillugu politikkikkut sulinermini qinersivimmi kingullermi peqataanermini anguniagaa pingaarnerpaaq tassaavoq suli Kalaallit Nunaata nammineernerulernissaa.
- Anguniarneqartariaqartoq tassaavoq innuttaasut politikkikkut sulinermi peqataatinnissaata qulakkeernissaa, aammali qallunaat kalaallillu ukiuni 300-ni inooqatigiissimanerisa pitsaasortaasa attatiinnarnissaat, Lars Emil Johansen oqarpoq.
- Taamaattumik uanga inuttut anguniagaraara Kalaallit Nunaata namminiilernissaa "free association" atorlugu pissasoq, tassa illuatungeriit pituttorsimanngitsut isumaqatiginninniutigalugu traktat-imik atsioqatigiinnerisigut, Lars Emil Johansen naqissusiivoq.
Ilanngullugu oqaluttuarpoq tulliani folketingimut qinerisoqalerpat politikki qimakkumiuk inuussutissarsiutinik sammisaqarniarluni. Ullumikkut Greenland Minerals & Energy-mi aamma Upernavik Seafood-mi siulersuisuni siulittaasuuvoq.
- Politikkimik suliaqarninni pingaarnermik suliarisimavara inuussutissarsiutit sinaakkusersornissaat. Politikeritut suliunnaaruma sinaakkutissat taakku immersueqataaffigissavakka, taamaalillungalu Kalaallit Nunaata namminersortup aningaasarsiornera tunngavilersussallugu, Lars Emil Johansen naggasiivoq.