Lars-Emil killitsisimavoq

Inatsisartut ullumi immikkut ataatsimiinnerat qineqqusaarnissamut aallarniutaavoq. Aammalu Lars-Emil Johansenip politikkikkut suleqataanermini ullumi naggammik sulivoq.
Assi © : KNR
marsip 13-at 2018 16:21

- Ukiut 40-t sinnerlugit politikkikkut suliaqareerlunga tunualerninni soorunami killitsisimallungalu tulluusimaarpunga, 24-nik ukioqarluni 1971-imi siullerpaamik qinigaasoq Lars-Emil Johansen oqarpoq.

Taanna maanna 71-inik ukioqarpoq ullumilu Inatsisartut immikkut ittumik ataatsimiinneranni Inatsisartunut siulittaasuattut naggammik aqutsisuuvoq.

- Taamani 71-imi pisut assut eqqarsaatigivakka. Taamanikkut inuusoqigatta nuanneqaaq, upernalerluni aput aatsitilerluni seqineq kissalluni, qiimaqaluta inuususseruttorluta sulineq aallartipparput.

AAMMA ATUARUK Apriilip 24-anni Inatsisartunut qinersissaagut

Namminersornerulerneq, ilinniarfippassuit pilersinneqarneri nunattalu EF-imit ilaasortaajunnaarnera, Lars-Emil Johansenip ilaatigut suleqataaffigisani ullumi kingumut eqqaamavai.

 - Isumaqarpunga ajunngivissunik angusaqarluta, soorunami suna tamarmi uparuagassaqartuaannarpoq. Kisianni 1971-imut nunatsinni pissutsit sanilliunneqarsinnaagaluaruni ullumimut qanoq siuariartigisimanersoq takuneqarsinnaassagaluarpoq.

Politikkikkut suleqataanerminit tunuaraluarluni siunissaq qularnartoqartinngilaa.

- Tassa isumaqarpunga siunissatsinnut isumalluarnissatsinnut pissutissaqarluinnarluta aamma maannakkut ingerlaaserput toqqissisimanarluinnarpoq. Politikerit pikkorissiartuinnarput taamaattumik siunissarput qaamavoq, Lars-Emil Johansen taama oqarpoq. Taanna 1977-imi parti Siumumik pilersitseqataavoq.

AAMMA ATUARUK Niels Thomsen qinigassanngortittoq