Lars-Emil: Kalaallit oqaasii siulliunneqartussaapput
Siunnersuummi qularnaarniarneqartut ilaatigut tassaapput kalaallit innuttaasut eqqartuussisulersuunneqarnerinut atatillugu kalaallisut oqaatsit siullertut inissisimasarnissaat, kiisalu innuttaasut kalaallisuinnaq oqaasillit allakkiat atuarsinnaanngisatik aqqutigalugit suli unnerluunneqarsinnaanerannik pineqaatissinneqarsinnaanerannillu atorunnaarsitsinissaq.
Lars-Emil Johansenimit tusagassiorfinnut nalunaarut naapertorlugu siunnersuut naammassillugu ilusilersorneqareerpoq qinersisoqartussaanngikkaluarpallu Folketingimi oktobarimi saqqummiunneqartussaagaluarluni. Tamatumalu peqatigisaanik Naalakkersuisunut Inatsisartunullu tusarniaassutigineqarluni.
Siunnersuummi unnerluussutit allagartaat kalaallisuunngortinneqarsimanngitsut aasarlu siusinnerusukkut Radioaviisimit kanngunartuliatut qulaarneqartut tunngavigineqarput.
Maanna siunnersuut nunatsinnit ilaasortanngortussanut aqagulu qinigaasussanut tunniuppaa.
- Namminersulersimanerput eqqarsaatigalugu maannakkumiit Kalaallit Oqaasii siulliunneqartussaapput qallunaatuumullu nutserineq kingulliusalerluni, pisariaqartinneqassappat. Allatummi pisoqaraluarpat Namminersulersimanerput eqqarsaatigalugu tamanna ippinnarluinnartuussaaq -innuttaasunut kalaallisuinnaq oqaasilinnut eqqartuussiveqarnermi ajornartorsiortitaalersussanut naapertuilluanngitsuliornerunerata saniatigut, Lars-Emil Johansen tusagassiorfinnut nalunaarummi erseqqissaavoq.
Demokraatineersoq Ane Lone Bagger tamatumunnga oqaaseqaatimini oqarpoq siunnersuutip taama kingusitsigisumik suliarineqarsimanera uggornartuusoq, qinersinissaq aatsaat oktobarimiluunniit suaarutigineqarsimagaluarpat siunnersuut akuersissutigineqarsinnaanavianngimmat. Kisianni suliniut ingerlateqqissallugu iluatinnaateqartoq Ane Lone Bagger oqarpoq.
