Lars-Emil Johansen siulittaasutut sulileqqissaaq

Lars-Emil Johansen, uummatimigut suliaritinnissani pillugu siorna novembarip aallaqqaataaniit sulinngiffeqalerpoq, Københavnimi Rigshospitalimi suliaritittussanngorluni.

Inatsisartullu siulittaasuat sulileqqinnissaminut piareersimasutut maanna misigisimavoq.

AAMMA ATUARUK Lars-Emilip suliaritinnera pissusissamisut ingerlasoq

Lars-Emil Johansen peqqinnerulersimasutut misigisimavoq, suliffimminulli sallaatsumik pulaqqikkiartornissani pilersaarutigaa:

- Maanna peqqissillunga suliffinnut uteqqissinnaalernera uannut assut nuannerpoq, misigisimavungami siornatigornit peqqinnerullunga qasujaannerullungalu suleqqilersinnaallunga. Taamaakkaluartoq inuuneq peqqinnerlu erlinnaqimmata suliffinnut pulaqqikkiartuaarnissara sallaatsumik ingerlatissavara, aallaqqaammut sivikitsuinnarmik suliffiinniittarlunga, Inatsisartut siulittaasuat Lars-Emil Johansen oqarpoq.

AAMMA ATUARUK Mimi Karlsenip Lars-Emil taarserallaleraa

Mimi Karlsen, Lars-Emil Johansenip napparsimalluni sulinngiffeqarnerani siulittaasuugallartutut issiavoq, Lars-Emil Johansenilu Mimi Karlsenip siulittaasuugallartutut sulineranut aamma qujassuteqarpoq.

AAMMA ATUARUK Lars-Emil Johansen indlagt