Mimi Karlsenip Lars-Emil taarserallaleraa

Mimi Karlsen qaammatini tulliuttuni pingasuni Inatsisartut siulittaasuattut paarlattaagallassaaq. Lars-Emil Johansen napparsimalluni sulinngiffeqartussanngormat, Inatsisartut siulittaasoqarfiat taama nalunaaruteqarpoq.
Allattoq Bikki P. Kleist, Anton Gundersen Lihn
oktobarip 31-at 2017 17:37

Inatsisartut siulittaasuat Rigshospitalimut tallimanngornermi oktobarip ulluisa 27-ianni unitsinneqarpoq 
Lars-Emil Johansenilu uummatimigut suliaritittussanngorpoq.

Misissuinermit inernerit tunngavigalugit Inatsisartut siulittaasuat Lars-Emil Johansen napparsimalluni sulinngiffeqarnissaminik siulittaasoqarfimmut qinnuteqarpoq. 

Lars-Emil Johansenip novembarip aallaqqaataani pilatsilluni suliarineqarnissaa naatsorsuutigineqarpoq.

AAMMA ATUARUK Lars-Emil Johansen uummatimigut suliaritissaaq

Inatsisartut siulittaasuata, Lars-Emil Johansenip napparsimalluni sulinngiffeqarnissaminik qinnuteqaataa Siulittaasoqarfiup marlunngornermi oqaluuseraa akueralugulu.

Tassa Lars-Emil Johansen novembarip ulluisa aallaqqaataanniit 2018-imi februaarip ulluisa aallaqqaataata tungaanut sulinngiffeqartussanngorpoq. 

Piffissami tassani Inatsisartut siulittaasuata tullia siulleq, Mimi Karlsen Inatsisartut siulittaasorigallagaattut inissisimassaaq. Mimi Karlsen New Yorkimi Naalagaaffiit Peqatigiit ataatsimeersuarnerannut maanna peqataasoq, ulluni aggersuni nunatsinnut utissamaarpoq.

Siulittaasoqarfik nalunaaruteqarpoq. 

AAMMA ATUARUK Lars-Emil Johansen indlagt

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq