Lars-Emil Johansen: Siumumi siulittaasunngorniuttut piukkunnaqaat
Siumut Nuuk sapaatiummat ullup qeqqaniit nereqatigiititsivoq. Partiimili ilaasortanut aamma qineqqusaarneruvoq. Siulittaasunngorniuttunimi pingasuni marluk najuunnerminni imminut ilisaritipput. Taakkua tassaapput Vivian Motzfeldt aamma Erik Jensen.
Inuit 60-nit amerlanerunngitsut peqataaqqusaasimapput, nereqatigiinnerlu nalunaaqutaq ullup qeqqaniit aallartimmat matut tamarmik matuneqarput.
Lars-Emil Johansen peqataasunut ilaavoq.
Taanna Siumumik 1977-imi pilersitseqataavoq. Partiillu pilersinneqarneraniit ukiut ingerlanerini siulittaasuuvoq, Naalakkersuisunut siulittaasuuvoq Inatsisartunullu siulittaasuulluni.
Maanna nuimavallaaranilu partiimi ilaasortaannaavoq. Partiilli ineriartornera malinnaavigiuarsinnarpaa, siulitaasunngorniuttunilumi pingasuusuni marluk nereqatigiinnermi imminut ilisaritimmata tusarnaarlugillu ersaartaappai.
- Isumaqarpunga assorsuaq tulluusimaarutissaasoq Siumukkormiuni taama piukkunnartigisunik inoqarmat. Sorleq qinissanerlugu ataatsimeersuartunut ajornakusuussaaq, Lars-Emil Johansen oqarpoq.
Siulittaasunngorniuttut atorluaasut
Siulittaasunngorniuttut Illorpumi najuuttunit apeqqarissaarfigineqarput.
- Isumaga malillugu torrallaaqaat, imaaliinnarluni oqartoqarsinnaanani una torrallaaneruvoq imaluunniit una torrallaannginneruvoq. Pissanganartorujussuussaaq, taanna oqarpoq.
Siumup ataatsimeersuarnissaa
- Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.
- Ataatsimeersuarnermi oqaluuserisassat naatsumik:
- Tallimanngorneq: Ataatsimeersuarneq workshoppernertalimmik ammarneqassaaq.
- Arfininngorneq: Partiip anguniagai pillugit oqallinneq.
- Sapaat: Oqalinneq, naatsorsuutinik saqqummiineq, siulittaasumik siulersuisunillu qinersineq.
- Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq.
- Siulittaasumik qinersineq nunatsinni politikkikkut aqutsinermut pingaaruteqaqimmat, minnerunngitsumillu kina Naalakkersuisunut siulittaasuussanersoq ersertussaammat - ataatsimeersuarneq toqqaannartumik aallakaatinneqassaaq
Siumup siulittaasua, Kim Kielsen, aningaasanut inatsisissamik isumaqatigiinniariartoqqinninnermini aamma najuutillatsiarpoq.
- Kim Kielsen ulluni makkunani aningaasanut inatsisissaq pillugu isumaqatiginninniarnerni suliaqarpoq. Kim Kielsen piffissaqalaarnermini Brunchertut alakkarpai. Anigaasaqarnermullu inatsisissamut isumaqatiginninniarnermut peqataanissaminut tunngatillugu ingerlaqqittariaqarsimalluni, Naalakkersuisut Siulittaasuata allattaa KNR-imut akivoq.
Siulittaasup nereqatigiinnermi tamakkiisumik peqataannginnera Lars-Emil Johansenip pitsaavallaannginnerarpaa.
- Isumaqarpunga pitsaavallaangittoq, uanga siulittaasuuninni pingaartittaqaara ataatsimeersualeriartornermi aaqqissuusinernut tamanut peqataanissaq.
- Soorunamili ataqqissavarput, qularnanngitsumimmi amerlasuunik suliaminut tunngasunik peqquteqarluni maanna najuutinngimmat, Lars-Emil Johansen oqarpoq.
Taassuma siulittaasunngorniuttut marluk akornanni sorleq piukkunnerugini oqaatigerusunngilaa. Siulittaasunngorniuttunili marluk Kim Kielsenip najuutinnginnerani saqqummiilluarnerarpai.
- Siulittaasoq maanna najuutinngilaq. Siulittaasunngorniuttunili marluk akornanni siulittaasoq nutaaq qinerneqarumaartoq ilimagaara. Taanna sorliussanersoq soorunami ataatsimeersuartut aalajangissavaat.
- Siulittaasunngorniuttuni marluk saqqummiilluarnissaminnut taamaalillutik periarfissanittorujussuupput. Isumaqarpungalu taamaaliortut, taanna oqarpoq.