Lars Emil Johansen: Paasissutissat pisariaqartitat saqqummiukkumaarpakka
Inatsisartut siulittaasuata Lars Emil Johansenip, Inatsisartuni sulinermi saniatigut inuussutissarsiutitigut assigiinngitsorpassuarnik atorfeqarlunilu suliaqarnera, inuiaqatigiinni peqquserluttuliortarnerup pinaveersaartinnissaa pillugu suliniaqatigiiffiup Transparency Greenlandip isornartorsiorpaa, Danmarkimilu aviisimi ullormut saqqummersartumi Berlingske Businessimi allaaserineqarluni.
Inatsisartunullu siulittaasunngoqqammersup tamanna ammaffigaa:
- Paasissutissanik saqqummiussinissatsinnut inatsisitigut maanna pisussaatitaanngilagut, Inatsisartulli siulittaasuattut pingaartippara qularutigineqassanngitsoq Inatsisartunut ilaasortaanerma saniatigut sunut ilaallungalu peqataanersunga paasissutissiissutigissallugu, Inatsisartut siulittaasuat Lars Emil Johansen oqarpoq, inuussutissarsiutitigullu aningaasarsiornikkullu soqutigisamik saqqummiunneqarnissaat siunniullugu:
- Paasissutissat saqqummiussassakka soorunami saqqammiutissavakka, aamma sinnernagu. Imaanngilaq inuunera qanoq issuseralu tamaat pappialamut taassumunnga allanniarikka, kisianni aningaasarsiornikkut soqutigisakka allat suunersut tamaasa qimassavakka piffissami uani qaninnerpaami, aap, Inatsisartut siulittaasuat Lars Emil Johansen oqarpoq.
Lars Emil Johansen Upernavik Seafoodimi siulersuisuni siulittaasuugaluarpoq, Inatsisartunulli qinigaanermini kingorna siulittaasutut tunuarluni. Taassuma saniatigut suliffeqarfimmik Auroramik aallarnisaaqataaleraluarpoq, tassanngaanniilli aamma tunuarluni, soorlu aamma uuliasiortitseqatigiiffimmik East Greenland Oilimik aallartitseqataallunilu piginneqataagaluartoq.