Lars Emil: Akisussaassuseqarnerunissamut periarfissaqareerpugut
- Tupigusuutigilaanngitsuunngilara, danskit kalaallillu oqartussaasut akunnerminni suleqatigiinneq taama pitsanngorsimatigigaluartoq, suli ulloq manna tikillugu takkuttoqartarmat, Danmarkip Nunatsinnut oqaatigisaminik allaanerulluinnartumik iliorsimaneranik takutsitsisunik.
Taama oqarpoq nunatta Folketingimut ilaasortaatitaa, Lars Emil Johansen, Siumut, CIA-p tigusanik parnaarussassanik Nunatsinnut aqqusaarussisarsimagunarneranik uppernarsaatinik, Wikileaksikkut saqqummiunneqaqqammersunik paasisaqarneq aallaavigalugu.
- Nunatsinnut tunngasut nunanit allaninngaanniit, tassa Danmarkimiit, isumaqatigiinniutigineqartuartillugit tupaallatsinneqartuartussaavugut, Lars Emil Johansen oqarpoq.
Taanna nangilluni oqarpoq, inatsit Namminersulernermut tunngaviusoq 2009-mi atuutilersinneqartoq ammaassereermat, nunanut allanut tunngasunik politikkikkut isumannaallisaanerlu eqqarsaatigalugit, Kunngeqarfik Danmarki sinnerlugu Kalaallit Nunaat isumaqatigiinniarsinnaammat, taassumalu inatsisip maanna atorluartariaqalernissaa piffissanngortoq:
- Apeqqutini ukunanerpiaq Nunarput pineqarmat, aqqutissaalluarpoq inatsisit atuuttut atorlugit Nunatta nammineerluni isumaqatigiinniartalernissaa, Lars Emil Johansen oqarpoq, nangillunilu:
- Danmarki isumaqatigiinniartuutillugu taamatut pisoqartuassaaq, taamaattumik Kalaallit Nunaata nammineq isumaqatigiinniarsinnaaneq tigusariaqalerpaa, tassami taamatut inatsisitigut periarfissinneqareerpugut.
Naalakkersuisut siulittaasuat Kuupik Kleist KNR-imut oqarpoq ataatsimut isigalugu danskit naalakkersuisui tatigalugit, tamannalu assortorneqarsinnaanngitsoq. Kisianni pisumi uani marlunnik oqalerlunilusooq avammut nalunaartoqartarsimasoq, tamannalu akuerineqarsinnaanngitsoq.
Taamatullu oqarnera Lars Emil Johansenip taperserpaa:
- Naalakkersuisut siulittaasuat taamatut naliliimmat isumaqatigaara, tassami marlunnik oqalerluni assigiinngitsunillu marlunnik imaanneraalluni, tamanna siunissami tatigeqatigiinnermik tunngaviusinnaanngilaq, Lars Emil Johansen oqarpoq.
Taassuma oqaatigaa Nunatta nunanit allanit ullumikkut soqutigineqarnera naapertorlugu, Nunattalu nunarsuatsinni inissisimanera eqqarsaatigalugu, piffissanngortoq uagut nammineerluta Nunatsinnut tunngasut isumaqatigiinniutigisariaqalerivut.
Naalakkersuisut siulittaasuata Kuupik Kleistip oqaatigaa, tallimanngormat januaarip 14-anni ministeriuneq Lars Løkke Rasmussen pisoq pillugu ataatsimeeqatiginiarlugu.
