VIDEO Ujakkaartartoq isumalluarfigisaq ajugaavissorami kuultinnappoq
- Ingerlalluaqaanga, ilumummi ingerlalluarujussuaqaanga. Qasuallaanngilangaluunniit. Aallarteqqaarnermi qasulaaraluarlunga, tullissaani qasunngilanga ajugaaniutivinnermilu nukittunerullunga misigisimavunga, taama kuultinattoq KNR-mut oqarpoq.
Sungiusartarfigisimasamini nuussuup mannguani Sisimiunut nuunnginnermini ujakkaarnermik ilinniarfigisimasamini unamminini ujakkaartartup SSP-imeersup ilorrisimaarutigaa.
Maanna Bjarne Herbert Hansenip AWG-imi peqataanini nuannersumik kingumut eqqaasinnaalerpaa.
- Tulluusimaarpunga. Ajugaassasorinngikkaluarama, iluatsipparali. Oqaannaraannimi sapinngilara, iluatsittarpoq, KNR-mut oqarpoq.
Ulu kuulti kuultinnaqqaatigaa. 5 kilometerimi ujakkaarnermi sisamaattut apissippoq, 7,5 kilometerernermilu amerlasuujulluni aallartinnermi 7-inngorluni.
Februaarip aallartinnerani danskit pissartanngorniunneranni inuusuttuni piginnaasalittut toqqagaavoq. Danskit pissartanngorniunneranni inersimasut akornanni unamminerni kingoraaqqattaalluni marlukkaarluni ujakkaarnermi 15-iinnarnik ukiulik sisoraaserluni ujakkaartartoq, Aká Olsen peqatigalugu bronzennaqataanikuuvoq.