Catalonien Avissaarniaqatigiit sivisuumik parnaarussassanngortinneqartut
Spaniap immikkoortuata Cataloniap spaniamit attaveqarunnaarluni namminersulernissaanik unioqqutitsisumik taasisitsisoqarneranit ukiut marluk qaangiuttorlugu politikerit cataloniamiut qulit suliniaqatigiiffimmilu aqutsisut marluk ullumi eqqartuunneqaramik pineqaatissinneqarput.
Catalonimiut præsidentimut tullersortigisimasaat Oriol Junqueras ukiuni 13-ni parnaarussassanngorlugu Spaniami eqqartuussisuuneqarfimmi ullumi pineqaatissinneqarpoq.
AAMMA ATUARUK Nunatta Cataloniallu inissisimanerat assigeequteqarpoq
Immikkoorniaqatigiit aqutsisui Spaniamit avissaarniaqatigiinni 2017-mi suliniuteqartuusut arlaqartut spaniami eqqartuussisuuneqarfimmi ullumi pineqaatissinneqarput.
Inuit katillutik qulingiluat ullumi pineqaatissinneqarput, taakkua ukiut qulingiluat 13-illu akornanni paarnaarusassanngorlugit pineqaatissinneqarput.
Cataloniamiut politikerit qulit suliniaqatigiiffimmilu aqutsisut marluk pikititsimasutut pikititsinissamullu kajumissaarisimasutut innuttaasullu taasitinneqarneranni pisortat aningaasaataannik atornerluisimasutut eqqartuussivimmi sassartinneqaramik unnerluussaapput
DR DK taama allaaserisaqarpoq.
AAMMA ATUARUK Cataloniap namminersortuunera atuukkunnaarsinniaraat
DR-ip europami tusagassiisartuata Anna Gaarslevip ilanngutassiamini oqaluttuaraa, eqqartuussineq pingaaruteqartuusoq, Cataloniap Spaniamit avissaarnissaanik aqqiagiinnginneq allarteqqissinnaamat, aqqiagiinngitsoqarneranilu qaangerneqanngimat eqqartuussisoqarneralu inupassuarnit kamaatigineqarmat.
Cataloniami naalakkersuisuusimasut, Cataloniap spaniamit avissaarnissaanik innuttaasunik 1 oktober 2017 taasisitsipput, taannalu sioqqullugu, spaniami nunai naalakkersuinikkut aaqqissuussaarnera akerleralugu Cataloniamiunit oqaatigineqarpoq.
Eqqissiviilliortoqaraluartoq innuttaasut spaniamiullu politiivisa akornanni aporaattoraluartoq innuttaasunik taasisitsineq ingerlanneqarpoq, cataloniamiullu inatsisartuisa spaniamit attaviitsuunertik nalunaarutigalugu. Tamatuma kingorna Catalonimiut namminersorlutik oqartussaanerat Spaniami naalakkersuisunit atorunaarsinneqarpoq.
