Nakorsaaneq: Corona nunatsinniittoq Tuluit Nunaanneersuuvoq
Nakorsaaneqarfiup tunillatsissimasut Nuummiittut coronamik sorlermik tunillatsissimaneranik misissuisitsinini siulliit akissutissarsivai, taakkulu Tuluit Nunaanni allanngorsimasumik, B117-imik imaluunniit Alphamik taaneqartartumik tunillatsissimasut nakorsaanerup KNR-imut uppernarsarpaa.
Aamma Ilulissani ataatsimik tunillanneqarsimasoqarpoq, taannali coronavirusimik sorlermik tunillanneqarsimanersoq suli paasineqanngilaq.
Statens Serum Institutip nittartagaa naapertorlugu Alpha coronap allanngornerinit allanit tuniluutianeruvoq, taannalu toqusoqarnerulersitsisinnaalluni. Coronap allanngornera taanna Tuluit Nunaanni 2020-mi septembarimi siullermik paasineqarpoq.
AAMMA ATUARUK Inuk ataaseq coronavirusimik tunillatsissimasoq paasineqartoq: Ernumanissamut pissutissaqanngilaq nunatta nakorsaanera oqarpoq
Angalasussanut kapuisoqapallannissaa
Nunatsinnit sapaatip akunnerani tulliuttumi angalasussat sapaatip akunnerani matumani akiuussutissamik kapitissinnaapput, siullermeertumimmi kapitinnikkut covid-19-imut illersuutissaqarlualereertoqartarmat.
Danmarkimut 24/6 - 1/7 akornanni aallassaguit sulilu akiuussutissinneqarsimanak qassinik ukioqarnerit apeqqutaatinnagu akiuussutissinneqarnissamut uku periarfissaraatit:
Marlunngorneq juunip 22-at, 2021 nal. 17.00 – Københavnimut ulloq 24/6-mut angalanissamut bilitsillit
Pingasunngorneq juunip 23-at, 2021 nal. 17.00 – Københavnimut ullunut 25/6-mut aamma 28/6-mut angalanissamut bilitsillit
Sisamanngorneq juunip 24-at, 2021 nal. 17.00 – Københavnimut 31/6-mut aamma 1/7-mut angalanissamut bilitsillit
Covid-19-imut akiuussutissaq Moderna atorneqassaaq.
Paasissutissarsiffik: corona.nun.gl
- Angalasussat akiuussutissamik neqeroorfigineqarnissaat innersuussutigilluinnarparput. Taakku piffissap ingerlanerani aamma uteqqittussaammata akiuussutissamik kapitinnissaat pingaaruteqarpoq.
- Tassami Danmarkimit maanna angalasut tunillatsissimanermik nassataqarsinnaajuaannarput. Amerlanerusut aallannginnerminni akiuussutisserneqareersimagunik angerlaqqinnissaminnut tunillatsissimanissaat aarlerinannginnerussaaq, nakorsaaneq oqarpoq.
Siullermeertumik akiuussutisserneqarneq illersuutaagaluartoq covid-19-imut akiuussutissamik aappassaaneertumik kapitinneq piffissamut sivisunerusumut qulakkeerutaavoq.
- Ataasiaannartumik kapitinneq piffissamut ungasinnerusumut illersuutissartaqanngilaq. Piffissaq ungasinnerusoq eqqarsaatigalugu illersuuteqartoqarniaruni taava aappassaanik kapitinnissaq pisariaqarpoq, taamaalilluni tunillatsinnissamut napparsimarululernissamullu aamma akiuussutissaqartoqassalluni, Henrik L. Hansen oqarpoq.
