Laila Friis-Salling ingerlaqqinngitsoortoq

TV2-p aallakaatittagaani Vild med dansimi peqataasoq, Laila Friis-Salling tallimanngornermi unamminermi ingerlaqqinngitsoorpoq, Laila Friis-Salling septembarimili unamminermi peqataalerpoq, nunatsinniillu malinnaaffigilluarneqarluni.

Allattoq Thomas Munk Veirum, Bikki P. Kleist

oktobarip 20-at 2018 19:00

Nunatsinnit OL-mut peqataasoq, qitinnerminilu unamminerni peqataasaqattaartoq tallimanngormat ingerlaqqinngitsoorpoq.

Laila Friis-Sallingip Morten Kjeldgaard qiteqatigaa, tallimanngormallu ingerlaqqinngitsoorlutik TV2.dk: taama allaaserisaqarpoq.

- Soorunami ingerlaqqikkusukkaluaqaagut, Laila Friis-Salling oqarpoq.

AAMMA ATUARUK Laila Friis-Salling siullermeerluni qitilersoq

Naak unamminermi Laila ingerlaqqinngikkaluarluni Vild med dansimi peqataanini nuannaarutigaa:
- Ingerlaqqinngitsoornerput tupannarpoq uppererpianngikkaluarparami, peqataanerli uannut pingaaruteqartorujussuuvoq, neriuppunga Kalaallit Nunaat takutilluarsimassallugu, Laila Friis-Salling oqarpoq nangillunilu:

- Ikinngutitaartorpunga, qitittariaatsillu arfineq marluk ilinniarlugit, taamaattumik nuanneqaaq, Laila Friis-Salling oqarpoq.

AAMMA ATUARUK Laila Friis-Salling Vild med dansimi peqataalersoq

Laila Friis-Salling qiteqataalu Morten Kjeldgaard Horsensimukaqqissapput, aallakaatitamilu Vild med dansimi ajugaaniutivittoqalerpat qitinnermi peqataasimasut tamarmik qiteqqissapput. Taamaattumik Laila Mortenilu sungiusaqqilaartariaqassapput.

Julie Berthelsen 2016-imi unamminermi aamma peqataavoq, unamminerillu arfineq marluk ingerlareersut ingerlaqqinngitsoorluni.

Laila Friis-Salling ingerlaqqinngitsoortoq

Aamma atuaruk