Kommune Thygep pisortanit ikiorsiissutaanut tunngatillugu suliami tunniutiinnanngitsoq
Inatsisartut Ombudsmandiata innuttaasullu Kommuneqarfik Sermersuumut ukiuni arfinilinni saqitsaassutigisaat eqqartuussivimmi aalajangiiffigineqartussanngorpasippoq.
Kommunimmi Ombudsmandip kommunimut qasseeriarluni inatsimmik unioqqutsineraasup sakkortuumik isornartorsiuinera isumaqatiginngilaa. Siullermik kommunip innuttaasoq pisortanit ikiorsiissutaanit appaasoqalerneranik ilisimatitsisimannginnera pillugu kingornatigullu ikiorsiissutit kingumoortumik apparneqarnerat pillugu.
- Suliamut tassunga tunngatillugu isumaqarpugut inatsisit naapertorlugit iliuuseqarsimalluta, tamatumunngalu inatsisitigut siunnersortigisarput isumaqataavoq, S uliffeqarnermut Isumaginninnermullu Ataatsimiititami siulittaasoq, Inge Olsvig Brandt oqarpoq.
Eqqartuussivimmi suliassanngorsinnaasoq
Ombudsmandip kommuni inatsimmik unioqqutitsisimasoq oqaatigiguniuk nunatta eqqartuussisuuneqarfianit eqqartuussutit eqqartuussiviillu qullersaqarfiinit eqqartuussutit innersuussutigisarpai, kommunilli Ombudsmandip eqqartuussutinut innersuussinera qinertuaarnerusoraa tamannalu kommunip inatsimmik unioqqutitsineranik uppernarsaataanngissoralugu.
AAMMA ATUARUK Thygemut tunngatillugu suliaq: Politikerit kommunip eqqunngitsumik suliaqarnera aalajangiiffigissagaat
Allatut oqaatigalugu kommuni Ombudsmandilu isumaqatigiinngissuaarput, taamaammallu suliaq eqqartuussivitsigut suliassanngorsinnaalluni.
- Inatsisartut ombudsmandiata sulineranut nalinginnaasumik annertuumik ataqqinnittaraluarpugut, matumanili isumaqarpugut suliaq eqqortumik suliarisimallugu, taamaattumillu ombudsmandip aalajangiisimaneranut atatillugu eqqartuussivimmut suliassanngortitsineq aqqutiginiarlugu, ataatsimiititaliap siulittaasua, Inge Olsvig Brandt oqarpoq.
AAMMA ATUARUK Thygep pisortanit ikiorsiissutisiarisartagai kommunimik peerneqariataartut
Suliaq Thyge Østergaardip – innuttaasup, pisortanit ikiorsiissutinik appaaffigineqartup akornanni ingerlavoq – Ombudsmandilli taanna sinnerlugu suliaq isumagivaa, kommunilu inatsimmik malinninngitsoq isumaqaruni kommuni eqqartuussivimmut suliassanngortissinnaallugu.
Suliaq eqqartuussivimmut suliassanngortinneqassanersoq Ombudsmandip suli aalajangiiffiginngilaa, Ombudsmandimili eqqartuussiveqarnermut pisortap, Kim Blokbop kommunip aalajangiinera allanngortinneqanngippat suliassanngortinneqarsinnaalluartoq oqaatiginikuuaa.
Suliap eqqartuussivimmi suliassanngoratarsinnaanera pissutigalugu kommuni Ombudsmandiluunniit piffissami matumani apersorneqarusunngillat.
