Kalaallit isiginnaagassiaat Bodilimik nersornaaserneqartussatut innersuunneqartoq
Danske Filmkritikerip nersornaammut Bodilimut innersuunneqartut tallimanngormat saqqummersippai. Innersuunneqartunilu kalaallit isiginnaagassiaat piviusuinnik tunngavilik ”Erinisunnerup Kingorna” ilaavoq.
Blåst Filmip Ánorâk Film aamma Bullit Film suleqatigalugit ”Erinisunnerup Kingorna” isiginnaagassiaraat. Emile Hertling Péronardillu Ánorâk Filmimeersup oqarnera naapertorlugu kalaallit isiginnaagassiaannik piviusuinnik tunngaveqartumik nersornaammut Bodilimut aatsaat siullerpaamik innersuussisoqarpoq.
- Danmarkimit nutaarsiassatsialak! Filmiliarput Erinisunnerup kingorna / Winter’s Yearning 2019-imi nersornaammik Bodilimik isiginnaagassiani piviusuinnik tunngavilimmik pitsaanerpaatut nersornaasiinissamut innersuunneqarpoq!, Facebookimi qiimmattarluni allappoq.
AAMMA ATUARUK Håbets Ø er nu på hjemmebane
Isiginnaagassiamut ilitsersuisup, Sturla Pilskogip oqarnera naapertorlugu innersuussineq tupaallannartorujussuuvoq.
- Tassanngaannaq takkuterataarpoq. Angummit pilluaqqusisumit allaffigiteriataarpunga, taamaammat tupaallannaqaaq. Nuanneqaarli, Sturla Pilskog oqarpoq.
- Isiginnaagassiaq norskit, danskit kalaallillu suleqatigiinneraat. Uannut inuttut nuannersorujussuuvoq, pissutigalugu kalaallit isiginnaagassiortarnerannut aamma tamanna pingaarluinnarpoq.
Maniitsoq takutinneqartoq
Isiginnaagassiami Erinisunnerup Kingorna Maniitsoq takutinneqarpoq. Isiginnaagassiami amerikamiut aluminiumik aatsitsivissualiornissaata nalunaarutigineqarneranit nuannaarnermik neriuuteqarnermillu siammarterisoqalerneranit inuit pingasut 2006-imit malittarineqarput, ukiulli kingerlanerani tamanna piviusunngornavianngitsoq erseqqissigaluttuinnarpoq.
Maniitsumi neriulluartumik qiimmatsattoqarnera malinnaaffigineqarlunilu pilersaarutip periarfeerukkiartornera pillugu pakatsineq neriuutissaarunnerlu aamma malinnaaffigineqarput.
AAMMA ATUARUK Ánorâk Filmip filmiliai marluk CPH:DOX takutinneqalersut
- Isiginnaagassiap innersuunneqarnera isiginnaagassiap maluginiartinneqarnissaanut atorsinnaagipput isumaqarpunga. Aamma tamanna Kalaallit Nunaannut kalaallillu isiginnaagassiortarnerannut isumassarsititsisinnaassasoq neriuutigaara, Sturla Pilskrog oqarpoq.
Isiginnaagassiat piviusuinnik tunngavillit akornannit ”Neriunnerup Kingorna” nersornaaserneqarnersoq februaarip 29-anni nalunaaqutaq 20.00 aalajangerneqassaaq.
Sturla Pilskogip suleqatigisimasanilu nersornaaserneqassanerlutik eqqoriarusunngilaa.
- Innersuunneqaannarnera uatsinnut ajugaaneruvoq, Sturla Pilskrog oqarpoq.
Isiginnaagassiat tassanga immikkoortumut innersuunneqartut ukuupput:
• Et ægte par (Emil Langballe)
• Forglem mig ej (Sun Hee Engelstoft)
• Håbets Ø (Sidse Torstholm Larsen & Sturla Pilskog)
• Q’s Barbershop (Emil Langballe)
• Western Arabs (Omar Shargawi)
