Illersornissamut ministeri annaassiniarnermi qulimiguullit pillugit: Air Greenlandimiinnissaat pingaaruteqarpoq
![](/sites/default/files/styles/image_934x467/public/article_images/trine-bramsen-940-cut.jpg?itok=Jhsq_2RZ)
Illersornissaqarfiup nunatsinni qulimiguulinnik annaassiniarnissamut upalungaarsimasuunissaq nutaamik suliarinnittussarsiuutinngilaa.
Tassunga taarsiullugu Air Greenlandimut isumaqatigiissutit maanna atuuttut, ukiortaami qaangiuttussat sivitsorneqarput.
Illersornissaqarfimmi Air Greenlandimut tatiginnittoq, Trine Bransen (Socialdemokraatit): oqarpoq:
- Sillimaniarnikkut politikkikkut isumannaatsuuvoq. Qulimiguullit kilitsissiaqaratarsinnaanera pissutigalugu sakkutooqarnikkut tunngaviusumik atorneqartussaanerat ilaatigut pissutaavoq, taanna KNR-imut oqarpoq.
EU-mi suliarinnittussarsiorneq
Isumaqatigiissutit suliarinnittussarsiuutinnginnissaanut aalajangiineq Air Greenlandip Illersornissamut ministereqarfiup Atortussanut Pisiortornermullu aqutsiseqarfianut toqqaannartumik isumaqatigiinniarsinnaaneranik isumaqarpoq.
Matumani EU-mi isumaqatigiilluni aalajangersagaq immikkut ittoq atorlugu nuna, Danmarkitut ittoq suliassanik atortussanillu niuerniarnermik EU-mi suliarinnittussarsiornermit ilaatitsinngissinnaaneraniippoq.
Tamanna nunami sillimaniarnermut soqutigisanut atatillugu naliliinermi suliaqarnissap pisiortorfimmut aalajangersimasumut imaluunniit nunap killeqarfiisa iluaniittumut tunniunneqartariaqarnera pisariaqarpat pisinnaavoq.
Isumaqatigiissutip Air Greenland ullormut akunnerit 24-t qulimiguulinnik marlunnik immikkut ittumik suliaqarsinnaasunik upalungaarsuutitaqarnissaanut pisussaaffilerpaa.
Suleqatigiilluartoqartoq
Illersornissaqarfiup Air Greenlandillu maanna suleqatigiinnera ajunngilluarsimasoq, Trine Bramsen isumaqarpoq.
- Suleqatigiilluartoqartorujussuuvoq. Ammasumik suliarinnittussarsiuussisoqarnerani isumaqatigiissummik tigumminnilersussaq tassaaratarsinnaavoq sillimaniarnikkut politikkikkut soqutigisanik isumaginninnissamut tunngatillugu peqatigeriinngisaq qanimullu ataatsimoorussaqarfiginngisaq, illersornissamut ministeri oqarpoq.
AAMMA ATUARUK Forsvaret vil forlænge helikopter-aftale med Air Greenland
Issittoq pissaanilissuit akornanni saqitsaaffiulerpoq, taamaammat nunanit taakkunannga suliassamut suliarinnittuuniartoqaratarsinnaavoq, Trine Bramsen oqarpoq.
Aaqqiissut isumannaatsuusoq
Naalli allamik suliarinnittussarsiorneq akikinnerusinnaagaluartoq Illersornissaqarfik isumannaatsumik aaqqiissuteqarusunneruvoq.
- Siullertut danskit Illersornissaqarfianut suleqatigiinnermi sungiussisimanermut tunngavoq. Kilitsissiaqaratarsinnaaneranulli aamma aarlerinartoqarpoq. Nunarsuarmi assigiinngitsorpassuarnik ajoraluartumik soqutigisaqartoqangaatsiarneraniileqqavugut, Trine Bramsen oqarpoq.
- Upperiatsajasuusinnaanngilagut. Taamaammat suliarinnittunik sakkortooqarnikkut atortunut isertitsigaanni tatiginninnissaq soorunami pingaaruteqarpoq. Air Greenlandimullu atassuteqarnermi tatiginnittoqarpoq.
- Suliarinnittussarsiuussinermi nunanit assigiinngitsunit tamanit assigiinngitsorpassuusinnaasunik soqutigisaqartunik suliarinnittoqarniarsarisinnaavoq. Takkulu suliarinnittussarsiuussinermi ajugaagaluarunik tamanna sillimaniarnermut politikkikkut ajornerpaanik kinguneqartitseratarsinnaapput.