Nakorsap nunatsinni akiuussutissat misissoraa: Qasseriarluta kapitissaagut?
Nunatsinni innuttaasut 64 procentii coronavirusimut tamakkiisumik akiuussusertissimalerput. Akiuussutissallu coronavirusimut akiuussinnaassusaata ukiup ataatsip ingerlanerani qanoq annikilliartortarnera paasiniarlugu nakorsaq Mie Møller misissuileruttorpoq.
Paasiniaanera sumut atorneqassanersoq paasiniarparput.
Mie Møller misissuigami, Nuummi Ilulissanilu innuttaasut katillugit 430-it qaammatit kingulliit aaviisaqattaarpoq.
- Timip akiuussutissamut qanoq qisuariarnera, akiuussutissamit qanoq illersugaatigineq kiisalu qanoq sivisutigisumik illersugaaneq misissuinermi tunngaviupput.
Timerpullu Modernamik covid-19-imut akiuussusertinnerup kingorna qanoq illersugaatigisarnersoq pillugu ima nassuiaatissaqarpoq.
- Akiuussusertinnerup kinguninngua aaviinerit misissukkat siulliit takutippaat, aak akiuussutissamik annertuumik akoqartoq. Immiartorfik timitsinnut assersuutigeriarutsigu taava akiuussutissamik ulikkaarpoq. Taamatullu coronavirusimut illersuuteqarluassaagut.
AAMMA ATUARUK Nakorsaaneq: Coronamut akiuussutissamik pingajussaaneernissamik 2022-mi tamanut neqeroortoqassaaq
Piffissalli ingerlanerani coronamut akiuussutissaq annikilliartortarpoq.
- Ukiup ataatsip missaa qaangiuppat aaveeqqileruma piffissaq ingerlareermat, akiuussutissat ilaat timimiikkunnaarsimassapput. Akiuussuserneqaqqaarnermiit akiuussutissat ikinnerupput, immiartorfiup pingajorarterutaa kisimi imaqarpoq.
Taamaattumiguna arlaleriarluta kapitittariaqartartugut.
- Piffissap ingerlanerani illersugaaneq ajorsiartortartoq. Taamaammallu akiuussuserneqaqqittariaqartartut.
Pingasoriaq, sisamariaq tallimariarluunniit kapitinneq?
Mie Møller nakorsaavoq, Ilisimatusarfimmi ilinniartitsinermi saniatigut ph-D-mik suliaqarluni. Taassumalu, aamma nunarsuarmi tamani akiuussutissap illersuisinnaassusaanik misissuisut allat paasisaasa, qasseriarluta akiuussusertissanersugut takutissavaat.
- Qaqugu akiuussuserneqaqqissanersugut, kiisalu coronamik tunillatsikkutta napparsimalernatalu toqqutiginnginniassagatsigu akiuussuserneqartuartariaqarnersugut paaserusuppara. Taamaattumik akiuussusertinnerit marluk ukua qanoq illersuitiginersut, pingajussanillu, imaluunniit sisamassaanik tallimassaanillu aamma paaserusuppara.
Nunatsinni innuttaasunik misissuinerup assinganik nunani tamalaani aamma ingerlanneqartut, Mie Møller nassuiaavoq. Inuiaat assigiinngitsut akornanni (befolkningsgrupper) misissuinerit inerneri assigiinngissuteqarsinnaasut, assigiinngissutaalli ilaat suli ilisimaneqanngitsut aamma nassuiaatigaa.
AAMMA ATUARUK Coronamut akiuussutisssaq Moderna, qaammatit arlallit qaangiunnerani suli sunniuteqarluartoq
- Taamaattumik sumiiffinni assigiinngitsuni misissuinissaq pisariaqarpoq, taamaaliornikkut nammineerluni paasissutissat pigineqassapput, taakkulu aallaavigalugit aalajangiisoqarsinnaalluni.
Nunarsuatsinni coronavirusimik napparsimallutik peruluttut ilarpassuisalu inuunerannik naleqartoq, nunatsinni pissutsit allaaneruneri, timitsinni sananeqaatit allaaneruneranik peqquteqaratarsinnaanera paasiniassallugu aamma soqutiginartoq, Mie Møller naggasiivoq.
Innuttaasut 430-t aaversinneri Rigshospitalimut nassiunneqarput, taakkualu ukiup nikikkiartornerani akissutissarsineqassasut naatsorsuutigineqartoq, Mie Møller ilanngullugu nassuiaavoq.
