Coronamut akiuussutisssaq Moderna, qaammatit arlallit qaangiunnerani suli sunniuteqarluartoq

Modernap coronamut akiuussutissiaanik marloriarluni kapitinnermiit qaammatit sisamat arfinillillu akornanni qaangiunneranni, akiuussutissartaa 93 procentimik suli sunniuteqarpoq.

Amerikamiut nakorsaasiorfiata qaammatini kingullerni pingasuni naatsorsuutiminik sisamanngormat saqqummiinerminut atatillugu taama nalunaarpoq.

Akiuussutissap ilisimatuussutsikkut siullermik misissornerani 94 procentimik qularnaassuseqarnera oqaatigineqarnikuummat, 93 procentimik qularnaassuseqarneratut nalilerneqarnerata assigiinnangajappaa.

- Coronamut akiuussutissiatsinnik kapitinnermiit minnerpaamik qaammatit arfinillit qaangiuttut 93 procentimik qularnaatsiginerata nikikkiartunnginnera, assut iluarusimaarutigaarput, Modernami allaffissornikkut pisortaq, Stéphane Bancel, oqarpoq. 

- Akiuussutissap sunniuteqaannarnera, inuit millionit arlalinnik hunnorujulikkaat, Modernap akiuussutissiaanik kapitissimasut iluaqutigissavaat, taanna nangilluni oqarpoq.

Modernap naatsorsuutaani ilaatigut takuneqarsinnaavoq, qaammatit kingulliit pingasut ingerlaneranni, coronamut akiuussutissanik 199 millioninik nakorsaasiorfik nioqquteqarsimasoq.

Ukiup aallartinnera ilanngukkaanni, 2021-mi qaammatit kingulliit arfinillit ingerlaneranni, akiuussutissat 302 millionit nioqqutigineqarsimapput.

AAMMA ATUARUK Akiuussutissamik kapitittartuni qallunaat amerlanerpaat ilagaat - tatiginninneq pissutaanerpaavoq

Coronamut akiuussutissat 2021-mi ukiup affaani siullermi Modernap nioqqutiginerani isertitat 37,1 milliard koruuniupput.

Taamaalilluni nakorsaasiorfiup isertitaasa ilarujussui, coronamut akiuussutissameersuupput, piffissamimi tassani isertitat 39,6 milliard koruuniummata.

Danmark Kalaallit Nunaallu coronamut akiuussutissamik Modernameersumik atuipput. Pisiortornissamut isumaqatigiissut EUp akisussaaffigisaa, tamatumunnga tunngavigineqarpoq.

Modernap coronamut akiuussutissiaanik marloriarluni kapitereeraanni, akiuussutissaq sunniuteqarluarnerusarpoq.

Siullermik kapitinnermiit ullut 28-t 45-llu akornanni qaangiukkaangata aappassaanik kapitittoqartarpoq.

2021-p ingerlanerani akiuussutissanik 800 millionit 1 milliardillu akornanni amerlassusilinnik nioqqutassiorsinnaassalluni, Modernap naatsorsuutigaa.