Akiuussutissamik kapitittartuni qallunaat amerlanerpaat ilagaat - tatiginninneq pissutaanerpaavoq

Qaammatini kingullerni qallunaat akiuussutissamik kapitittarnerat sukkatsikkiartuaarsimavoq.

Danmarkimi akiuussutissamik kapitittartut upernaaq Israelimit Tuluillu Nunaannit ikinnerunerat isornartorsiorneqartarnikuusoq, maanna kapitinnikut amerlanerpaat 21attut inissippoq.

Kisitsisit Johns Hopkins Universitymeersut tamanna takutippaat.

Miliuunit inorlugit innuttallit soorlu Seychellerne, Island aamma Malta, kapitittoqarnerpaat sisamat akornginiittut, maanna Danmarki 16iattut inissippoq.

Innuttaasut akorngini qassit covid-19imut akiuussutissamik naammassillutik kapitereersimanerannik nalunaarsukkat aallavigalugit taama isikkoqarpoq.

Aarhusip Universitetiani Naalagaaffik pillugu ilisimatooq, Michael Bang Petersen, oqarpoq, innuttaasut oqartussanik tatiginninnerat tamatumunnga pissutaasoq.

Coronap tuniluunnerata nalaani qallunaat qanoq isiginneriaasaannik pissusilersuutaannillu naqissusiinerit pillugit suliarisaq, Hope, taassuma siuttuuffigaa.

- Oqartussanut tatiginninneq tassani pissutaaversaavoq. Tamanna nunanit allaniit Danmarkimi qaffasinneruinnarpoq.

- Tatiginnilluarnerup ukiuni qulikkaani arlalinni kulturitsinnut ilanngullugu annertusiaartsinnikuunera, soorunami pissutaaqataavoq, taanna oqarpoq.

Sverige 38tut inissisimavoq. Sverigemi aamma tatiginnilluartaraluartut, corona pillugu attaveqarniarneq ajutoorsimavoq, taamaammallu innuttaasut akiuussutissanut tatiginninnissinnaanerat appariarsimalluni, Michael Bang Petersen isumaqarpoq.

- Tassa oqartussaniit paasititsiniaanerit qanoq tutsuiginartinneqartiginerat uani apeqequtaavoq.

- Danmarkimi paasititsiniaanerit iluamik ingerlasimanerat tatiginninnerullu qaffasinnera pissutaallutik, akiuussutissamik kapitikkusuttut amerlanerannut pissutaapput, taanna oqarpoq.

Danmarkimi innuttaasut maanna 72 procentii covid-19imut akiuussutissamik ataasiarlutik kapitereerput. 54,9 procentit marloriarlutik kapiitinnikuullutik naammassereersut.

Kalaallit Nunaanni 64 procentit akiuussutissamik siullermeertumik kapitissimapput.

46 procentit tamakkiisumik akiuussutisserneqarsimapput.

35 procentillu akiuussutissamik kapitissimanngilluinnarlutik.

Akiuussutissamik marloriarlutik kapitereersut Maltami amerlanerpaajullutik, innuttaasut 76,1 procentii kapitereerput.