Kúkop allamik parteeqalernera Sermersuumi suleqatigiinnut sunniuteqassanngitsoq
Atassut Kommuneqarfik Sermersuumi ataatsimik ilaasortaatitaqarluni suleqatigiit peqataaffigai. Mala Høy Kúkolli Atassummit ilaasortaajunnaarluni Siumumi ilaasortanngorneratigut Ilaasortaatitaq taanna Siumumut sapaatit akunnerata siuliani aamma nuuppoq.
Sermersuumi kommunalbestyrelsimi suleqatigiit ilaasortaatitamik ataatsimik taamaalillutik aamma annaasaqarput. Sunniuteqarnavianngitsorli, Inuit Ataqatigiinnit Demokraatiniillu oqaatigineqarpoq.
- Mala Høy Kúkop partiimut allamut nuunnera pissutigalugu apriilimi politikkikkut isumaqatigiissutigisatta
allanngortinnissaa pisariaqanngilaq. Inuit Ataqatigiit aamma Demokraatit ullumikkut taamanisulli isumaqatigiissutip
oqaasertai tamakkiisumik tunuliaqutserpaat. Kommunimut tamarmut anguniakkat annertuut arlallit imarivai,
taakkualu piviusunngortinnissaat tamatta siunniusimavarput.
Borgmester Asii Chemnitz Narupip Kúkop partiimut allamut nuunnera aamma sunniuteqassannginnerarpaa.
- Upernaaq qineqqusaarnitsinni ersarissunik siunnersuuteqarnissaq pingaartipparput, Demokraatillu peqatigalugit
siunissamut isigisumik, annertuumik anguniagaqarluartumillu Kommuneqarfik Sermersuumi ukiuni aggersuni
politikkikkut sulinissaq najoqqutassiorparput. Suliaq tamanna unigani ingerlaannaassaaq, borgmesteri taama oqarpoq.
Mala Høy Kúkop partiimut allamut nuunneratigut partiit suleqatigiit kommunalbestyrelsimi ilaasortaatitaat 19-iusunit 12-inngorput.