Københavnimiunut kalaalimerngit ullut tamaasa
Qeeqqamik sassaallertoqarpoq Københavnimi Kalaallit Illuutaanni aaqqissuussineq nutaaq atulermat, taamaasilluni sutortarfimmi Ajamut-mi ulluinnarni kalaaliminernik kissartortoqarsinnaalerpoq.
Steffen Jensen pisiniarfimmik Greenland Artimik Kalaallit Illuutaata kælderianiittumik ingeriatsisoq aamma Kalaallit Illuutaat suleqatigiillutik aaqqissuussinermik tassannga aallartitsipput.
- Kalaalerpassuit ullut tamaasa Kalaallit Illuutaannut isertarput. Maannamut taamaallat marlunngornikkut tallimanngornikkullu nerisassanik tuniniaasoqartarpoq, maannali pitsaasumik isumaqatigiissuteqaratta igaffik uanga ingerlatarilerpara, Steffen Jensen taama KNRimut oqarpoq.
Ammasarfiit amerlinissaat sioqqullugu Kalaallit Illuutaannik Ajamut-millu taamaatuttaaq kalaallit peqatigiiffiit tusarniaavigineqarsimallutik. Taakku tamarmik kissaatigisimavaat ullut tamaasa kalaaliminernik tuniniaasoqartalernissaa.
Iluarisimaarinnittullu ilagaat Johannes Poulsen.
- Mamavipput iluaqaarlu nunatta qeeraanik ussiilluni. Sapaatip akunnerata ingerlanerani arlaleriarlunga maannartarpunga, oqarpoq.
Sutortarfik ammasarput nalunaaqutaq aqqarnup tallimallu akornanni, misiliillunilu aaqqissuussineq qaammatini pingasuugallartuni ingerlanneqartussaavoq.Nerisassat igasup iffiortullu Karl Frederik Skiftep suliarisarpai.