Københavnimi siunnersorteqartitsinissamik aaqqiissuussineq sullitassaaleqivoq
Siunnersorteqarnissamik aaqqissuussineq nutaajusoq Ilimmik taaguteqartinneqarpoq, Kalaallit Illuutaatalu Københavnimiittup nunasisut inuiaqatigiinnut ilanngutsinniarneqarnissaannik suliniutaanut atasuulluni. Kalaallit Nunaannit nunasisut Københavnimi inuunermut ikaarsaarnerminni nakkaallutik isumaginninnikkut ikiortariaqalernissaat pitsaaliorniarlugu ikorfartorneqarnissaat siunertaavoq, suliniummik ingerlatsisut ningiuat Mille Schiermacher oqaluttuarpoq.
- Ullumikkutut inissisimasoqartillugu, kalaallit Danmarkimiittut isumaginninnikkut ikiortariaqaleraangata aatsaat ikiorneqarnissaannik neqeroorfigineqartarput. Iliup atuisut aqqutissaanni ikiussavai Danmarkimilu inuulernerminni piginnaasassaannik ikiorlugit.
Suliniummili sullinniarneqartut pissarsiariniarnissaat imaannaanngilaq. Taamaammat Kalaallit Nunaannut aqagu aallassaaq, ilaatigut kommunini Paarisamilu sulisut ataatsimeeqatigiartorlugit siunnersorteqartitsinissamillu aaqqissuussineq nalinginnaasumik paasititsiniutigiartorlugu.
Ilimmi periaaserineqartoq tassaavoq, siunnersortaasut nammineq neqeroorutigisinnaasatik atorlugit siunnersuinissaat; ikiortariaqartutigut ikiuussinnaapput imaluunniit sussareqatigiinnikkut ikiuussinnaallutik, aamma atuisut kissaataat naapertorlugit siunnersortissat toqqarneqartassapput. Aaqqissuussineq nammineq kajumissutsimik tunngaveqartumik ingerlanneqarpoq, siunnersortillu siunnersugassaatalu suna qanorlu annertutigisumik sammisaqassanerlutik nammineerlutik aalajangertassavaat.
Mille Schiermacker kalaallit angerlarsimaffeqanngitsut pillugit immikkut allaaserisaqarnerminut atatillugu taamatut suliniuteqarnissamik 2009-mi isumassarsisimavoq.
- Silarsuaq ilisimasaqarfiginngisartik appakaaffigisarpaat, ilisarisimasaqaratik, aamma Danmarkimi oqartussanut ikiortissarsiniarnissartik nukissaqarfiginagu misigisarput. Siusinnerusukkut ikiorneqarsimasuugunik allatut pisimasinnaagaluarput.
- Iliup nunasisunut inuiaqatigiinnut danskinut ammanerulersitsisinnaanissaa aammalu attaveqaqatigiinnik pitsaasunik pilersitsisinnaanissaa neriuutigaara, taamaaliornikkut kalaallinut atornerluisuusunut immikkoorniartunut ilanngunnissaat pinngitsoortinneqarsinnaassammat.
Suliniut 2014-imi aggustip qaammataata tungaanut aningaasalersugaagallarpoq, ilaatigut Oak Foundationimit aningaasaliiffigineqarsimalluni. Suliniutip immini ingerlalernissaa pilersaarutaavoq, aqutsinerlu annertunngitsoq Kalaallit Illuutaannit ingerlanneqarnissaa aamma pilersaarutigineqarluni.
