Kuussuaq aarlerinartorsiortitsivoq

Kangerlussuarmi kuussuup ernga suli qaffasittorujussuuvoq. Kuussuup erngata nalinginnaasumik piffissami kingullermi qaffasippallaarnera pissutaalluni isumannaallisaaniarnermik suliallit sapinngisamik tamarmik maanna sulitinneqarput.

Tamannalu Qeqqata Kommuniani kommunaldirektørip Paneeraq Olsenip KNR-imut ullumi uppernarsarpaa.

Kangerlussuarmi ikaartarfiit marluk, kuussuarmi nunaqarfiup avannarpasissortaanik kujasissortaanillu atassusiisut ilamerngi maanna kuugussaasimapput, kujasissortaatalu innaallagissamik pilersorneqarnera eqqorneqarsinnaalluni.

Kuup taama supitiginera silap pissusaata allanngoriartorneranik pissuteqarunavippoq, Sermersuup aakkiartorneruneranik pissuteqarluni.

Qeqqata Kommuniani kommunaldirektøri aaqqiissuutissanik oqaluuserisaqarlutik  kommunimeersut allat peqatigalugit ullumi ataatsimeeqateqarpoq.

Ikaartarfiugallarsinnaasoq Danmarkimit maanna tikisinniarneqalerpoq, taannali umiarsuarmik aatsaat sapaatip-akunneri pingasut qaangiuppata tikiunneqarsinnaassaaq.

Mittarfeqarfiit pisortaata Jens Lauridsenip KNR-imut oqaatigaa, Kangerlussuup imermik innaallagissamillu pilersorneqarnera innarlerneqarsimanngitsoq, soorlu aamma radareqarfik innarlerneqarsimanngitsoq:

- Kisianni arlaannik pisoqariataarsinnaaneranik upalungaarsimavugut, pilersaarusioreerlutalu, Mittarfeqarfinni pisortaq Jens Lauridsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat