Kuupiup piffissaligaanngitsumik pineqaatissiisarneq atorunnaaqquaa
Kalaallit atugaat pillugit Kuupik Kleistip Danmarkimi inatsisinik atortitsinermut ministeri ataatsimeeqatiseraa.
Kalaallit Nunaanni pinerluttulerinermi inatsit nutaaq januarip aallaqqaataanit 2010-mi atuutileraluartoq suli qangatut pineqaatissiisoqartarpoq. Piffissami killiligaanngitsumik pineqaatissiisarneq sakkortuumik pinerluutilinnut atorneqartarpoq, atorneqartarsimallunilu pinerluttulerinermik inatsisip siulliup 1954-imiilli atuutilerneraniit, suli ullumimut atuulluni.
- Taamatut pineqaatissiisarneq ullutsinnut naleqqutinngilaq, Kuupik Kleist oqarpoq.
Inuttut pisinnaatitaaffinnik illersuiniaqatigiiffiup Amnesty Internationalip Kalaallit Nunaat Danmarkilu pineqaatissiisarnerat pillugu siornatigut uparuartareerpai.
-Isumaga malillugu pingitsoorani taarserneqartariaqarpoq katsorsartinnermik, assersuutigiinnarlugu Herstedvesterimiittut katsorsarneqartarput minisotabehandlingerlutik tassa qaqiffillutik tamannalu nuannaarutigineqartarpoq iluaqutigineqartarlunilu. Taavalu aamma saniatigut pisariaqartitsippata nakorsaatinik ikiorserneqarsinnaasarlutik, Henriette Berthelsen oqarpoq.
Henriette Berthelsen Socialministerip ataani Herstedvesterimi parnaarussanik sullissisarnermini Kalaallinik pinerlussimasunik killiligaanngitsumik Herstedvesterimi pineqaatissinneqartut qanimut sullittarsimavai.
- Piumassuseerunneq, aliasorujussuarneq, siunissamut takorluuisinnaannginneq, kamanneq, tujormineq assigiinngitsullu kalaallit misigisarpaat.
Misigissutsikkut qimaasarput soorlu hashitorlutik atuipilulersinnaasarput.
Pineqaatissiisarneq 1954-imiilli atuutilersoq ullutsinnut naleqqukkunnaarnera Naalakkersuisut Siulittaasuata tikkuarpaa.
- Uanga isumaqatigilluinnarpara, taanna pissusilersuut killiligaanngitsumik pineqaatissiisarneq inummut tarnikkut peqqinnanngitsorujussuuvoq.
Kinguaassiuutitigut atornerluisimasutut pineqaatissinneqarsimasut katsorsarneqartarnerat pillugu Inatsisartunut Naalakkersuisunullu ilaasortanik Naalakkersuisut Katuami maajip 14-iani 2010-mi isumasioqatigiisitsereersullu, Naalakkersuisut siulittaasuat Kuupik Kleist taama isummerpoq.
Isumasioqatigiisitsinermi saqqummiussisut ilaat, kriminolog, dr. jur. Evy Frantzsen, Ilimmarfik, Nunani avannarlerni aamma Tuluit Nunaanni parnaarussivinni parnaarussat katsorsarneqartarneranni paasisimalikkanik saqqummiussivoq.
Taakkunani inuit ataasiakkaarlugit katsorsarneqartarput, matumanittaaq napparsimasunik oqaloqatigininnikkut katsorsaanissamut ilinniarsimasunit parnaarussat ataasiakkaat katsorsarneqartarlutik. Katsorsaanermi pingaartutut siunertaavoq nutaamik pinerluuteqarsinnaanerup pinaveersaartinneqarnissaa.
Nunatsinni pinerlussimasut katsorsarneqartalernissaat piumasaqaataasalissasoq politikerit isumasioqatigiinneqarneranni aamma anguniagassaattut saqqummiunneqarpoq.
