Kuupiup Namminersornermi siulersuisuutitat tatigai
Nunatsinni suliffeqarfissuup Royal Greenlandip Danmarkimi siulersuisunut siulittaasoqarnera pisortaqarneralu Jan Cortzenip maluginiagaasa annersaraat.
- Kalaallit sisamat Royal Greenlandimi siulersuisut siulittaasuattut pisortatullu atorfeqarluarsinnaasut naapinnikuuvakka. Kalaallit Nunaat namminersulissappat amigartoorfiunngitsumillu aningaasaqassalluni qallunaanik pisortaqartarneq imminut akilersinnaanngilaq. Taarsiullugu kalaallinik pisortaqarnissaq anguniarneqartariaqarpoq, Jan Cortzen oqarpoq.
Jan Cortzen aamma isumaqarpoq Namminersorlutik Oqartussani Kommunimilu pisortat piukkunnanngitsut amerlavallaartut. Immitsinnut aperisariaqarpugut kiaaku atorfinitsitai?, Jan Cortzen oqarpoq. Apeqqut taanna Kuupik Kleistimut ingerlateqqipparput, siullermillu ima oqarpoq:
- Naluara Jan Cortzenip pisortat qallunaat suliaminnut piukkunnanngilluinnartutut isigisani qassit ilisarisimanerai. Uagut naalakkersuisuni akisussaaffipput tassaavoq suliffeqarfinni inuiaqatigiinnit pigineqartuni siulersuisunik ukiumoortumik qinersinissaq, taannalu akisussaaffik naapertorlugu soorunalimi siulersuisunik ilaasortassat suliamut naleqqunnerat, aammalu suliassaminnik piginnaaneqarnerat, tunngavigalugu toqqartuisarpugut, allanik tunngaveqarata, tassa soorlu naalakkersuinikkut qanoq isumaqarnerannik, inuit imaluunniit ammip qalipaataa suunersoq taanna aallaavigineq ajorparput, aallaavigisassarput taamaallaat tassaavoq suliaminnut pikkunnartuunersut. Kuupik Kleist oqarpoq, nangillunilu:
- Kisianni siulersuisut akisussaaffigivaat suliffeqarfinni pisortassanik atorfinitsitsinissaq, tassanilu naatsorsuutigivara soorunalimi siulersuisut atorfinitsitassamik piginnaaneri naapertorlugit atorfinitsitsisassasut. Soorunalimi tamanna kissaatiginarnerpaavoq, kisianni erseqqissaatigeqqissavara inatsisit naapertorlugit, aammalu suleriaaseq naapertorlugu tassa suliffeqarfinni siulersuisut pisortassanik atorfinitsitsineq akisussaaffigivaat, taannalu naalakkersuisuninngaaniit akuleruffigineqartussaanngilaq, Naalakkersuisut siulittaasuat naggasiivoq.
