Kuupiup anguniakkani anguvaa

Issittumi Siunnersuisoqatigiit ministeriisa ataatsimiinnerat naammasseqqammerpoq, anguniakkallu ilimagisaareersut anguneqarlutik. SAR-imik taallugu immami isumannaatsuunissaq pillugu isumaqatigiissut atsiorneqarpoq, Siunnersuisoqatigiit allaffissaat Tromsømiissaaq aammalu Kinap, EU-p nunallu allat alapernaatsutut aalajangersimasumik inissisimanissaat itigartitsissutaagallarpoq.

Svenskilli ukiuni tulliuttuni marlunni siulittaasuuneranni apeqqut taanna isummerlfigfineqassasoq isumaqatigiissutaavoq. Ataatsimullli isigalugu naammassisat iluarisimaaneqarput, ingammik tikeraartitsisumit Kuupik Kleistimit.

- Issittumi Siunnersuisoqatigiit ministeriisa ataatsimiinnerisa naammassineqarnera pitsaasoq naammagisimaarpara, Nalakkerusisut siulittaasuat, Kuupik Kleist oqarpoq nangillunilu.

- Ataatsimiinnermi anguniakkagut tamakkipajaarlugit isumaqatigiissutigineqarput. Issittumi Siunnersusoqatigiit oqaluttuarisaanerani alloriarneq annertooq maanna pivoq tassalu, nunat ilaasortaasut akornanni atsiortoqarpoq isumaqatigiissummik pituttuisuusumik. Ukiuni kingullerni 15-ini Siunnersuisoqatigiinni pituttuisuusumik atsiortoqarnissaa ajornakusoortorujussuusimavoq. Tassalu maanna tamanna Nuummi pivoq, Nunatsinnilu taama pisoqarnera soorunami uagutsinnut pingaaruteqartorujussuuvoq, Kuupik Kleist oqarpoq.

Anguniakkat saniatigut allanik angusaqartoqarsimanerpa?

- Danmarkip, Nunatta aammalu Savalimmiut siulittaasuuffimmik tigummiaqarnerani anguniakkagut aalajangiussimasagut angullugit oqaatigisinnaavara, oqartoqarsinnaallunilu anguniakkagut sinnerlugit angusaqartoqarsimalluni, tamannalu pisinnaasimavoq isumaqatigiinniarluarnerup kinguneranik, naak nikititsisoqalaartarsimagaluartoq, Kuupik Kleist oqarpoq nangillunilu.
- Ministerit peqataasut akornanni naammagisimaarinninneq uannut oqaatigineqartoq aammalu taakku Kalaallinut tamanut qujassummik apuussaqarnissannik kissaateqarnerminni oqaaseqarnerisa takutippaat, ataatsimiinnermi angusaqarluarsimasugut, Kuupik Kleist oqarpoq.

Nunarsuatsinni nunat pissaanilissuit politikkerii tikeraartoraatit. Tamanna ilinnut qanoq issimava?

- Nunatsinni soqutigisagut eqqarsaatigalugit taama pissaaneqartigisunik tikeraartoqarnerput pingaaruteqarsimavoq, assersuutigiinnartigu issittumi nunat inoqqaavisa siuariartorneri inuuniarnikkullu atugarisaat eqarsaatigalugit, siunissamilu anguniagassagut eqqarsaatigalugit tamanna pingaaruteqarluinnarpoq. Ullumilu ataatsimiinnerup nalaani oqallisigineqartut eqqarsaatigalugit, issittuni inuit qitiutinneqarnissaat tamassumalu paasineqarluarnissaa taamannalu suleqatigiissutigineqassasoq oqaatigineqarluni.

Ataatsimiinnermi imminut susassareqatigiinneq qanoq pingaaruteqarsimatigaa?

- Pingaaruteqaqaaq. Tassami oqaloqatigiinnerit pitsaasumik ataqqeqatigiillunilu oqaloqatigiinnerit atortillugit tamanna avaqqunneqarsinnaanngilaq, taamaattoqartillugumi nukiit piumassuserlu annertusisarput, tamatumalu kingunerisarlugu oqaloqatigiinnerit pitsaasut. Assersuutigiinnartigu nerisassat sassaalliutigut ajorsimappata tikeraartitsinerpullu pitsaasimanngikkaluarpat soorunami angusagut ajornerusimassagaluarput, Kuupik Kleist oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat