Kuupik versus Aleqa Night iluatsilluarpoq

Naalagaaffiup Nunatsinnut tapiissutai, aalisarneq minnerunngitsumillu aatsitassarsiorneq pillugu, Kuupik V. Kleist aamma Aleqa Hammond KNR-ikkut toqqaannartumik ippassaq unnukkut oqallipput.

- Qineqqusaarnernit allanit allaaneruvoq, tassa itinerusumik pineqartut oqallisigisinnaagatsigit, tamannalu iluarpoq, Inuit Ataqatigiit siulittaasuat, Kuupik V. Kleist oqallinnerup kingorna taama oqarpoq.

Siumullu siulittaasua, Aleqa Hammon isumaqataavoq.

- Isumaqarpunga ajunngitsumik ingerlasoq, marluinnaallutalu oqallinnitta iluaqutigaa piffissaqarnerulaarluta akisinnaagatta aamma assigiinngequtitta erseqqisaassutiginissaanut periarfissaqarmat, Aleqa Hammond oqarpoq.

- Assigeequtitta suleqataaffigisinnaasattalu oqaatigineqarneri isumaga malillugu ajunngittorujussuuvoq. Inuiaqatigiit kissaatigaat Inuit Ataqatigiit Siumullu suleqatigiissinnaanerannik oqariartorneq tamassumalu qanoq anguneqarsinnaaneranik apeqqut qaqinneqartoq malugaara, Aleqa Hammond oqarpoq.

Inuit Ataqatigiit siulittaasuata oqallinneq ima nalilerpaa.

- Oqallinnerit tamarmik pissarsinartarput, uumali eqqumeequtigilaaginnarpaa amerikamiutut pissuseqarluni qineqqusaartitsisoqarmat. Kisianni alutornarpoq, kisianni inuit ilisimassavaat, qinigaasoq kinaluunniit Nunatsinni naalakkersuisut siulittaasunngorsinnaammat, imaanngitsoq siumut aalajangerneqareersoq kina Nunatsinni siuttunngorumaassanersoq, Kuupik V. Kleist oqarpoq.

KNR-ip aallakaatitsinerani aqutsisuusoq, Stina Skifte oqalliseriaatsimut taamaattumut aamma iluarisimaarinnippoq.

- Ajunngitsorujussuarmik ingerlatsivugut ilaannili qineqqusaarutaannik oqalutsitsigaatsiartoortarpunga, kisianni tassa tamanna aallakaatitsinerup isumagaa aamma partiitik sinnerlugit isummatik anissagaat isumaalluni. Tamatuma kingunerissavaa sorliup politikkia qinersisartut namminneq illersussanerlugu aalajangissammassuk aamma qinersisarsut isummertissinnaaniarlugit qineqqusaartitsineq pivoq, aallakaatsitsinermi aqutsisuusoq, Stine Skifte oqarpoq.