Kuupik V. Kleistip aatsitassarsiorneq pillugu nalunaarusiaq nutaaq qinngulunnaraa
Nunarput nunat aatsitassarsiornermi aningaasaliiffigissallugit soqutiginarnerit akornanni 83-ini normu 63-imiippoq, tamanna siusinnerusumit 29-nik kinguariarneruvoq. Tamanna canadamiut misissueqqissaartarfiata, Fraser Instituttip aatsitassarsiorneq pillugu nalunaarusiaani kingullermi atuarneqarsinnaavoq.
Misissueqqissaarneq suliffeqarfiit aatsitassarsiorfissanut assigiinngitsunut isiginninneraat, tamannalu Nunatsinnut pitsaasuunngilaq. Misissuinermi aatsitassarsiornermik suliaqartartut pilersaarummik aallartitsinnginnerminni misissuiffigeqqaartarpaat.
- Tamatigut appariarsimanera soorunalimi eqqarsaammernarpoq. Aammalu aningaasalerusussutsimut iluaqutaanani. Tamanna ajuusaarnarpoq.
AAMMA ATUARUK Kalaallit Nunaat soqutigineqarunnaariartortoq
Kuupik V. Kleistip oqarnera naapertorlugu kinguariaateqarneq Nunatsinni aatsitassarsiornermik suliaqarnissamut kingunerluinnarani aamma inuussutissarsiornernut allanut kingunerlussinnaavoq.
- Tassa ukiuni kingullerni malunnartumik aningaasaliinissaq aamma nutaanik aallartitsinissaq tunuarsimaarfigineqarpoq, ajoraluartumik. Massakkullu ukioq manna nalunaarusiaq tunngavigalugu tunuarsimaarnerup nangiinnarnissaa tassa aarleqqutigisariaqarpoq.
Misissueqqissaarnermi akissuteqarluni peqataasup, atilerneqanngitsup, akuersissutisinissamut piumasaqaatit allanngorarnerarpai allaffissornerlu arriillunilu ajornakusoornerarlugit. Taama misigisoqartarnera Kuupik V. Kleistip siornatigut tusareernikuuaa.
- Assigiiaartorujussuarmik isummersorput, pingaartumillu allaffissornikkut sullissinerup naammaginannginnera tikkuartorneqartarluni.
Tamatuma saniatigut malittarisassat allanngortinneqakulanerisigut inuussutissarsiornerup pingaartumik aatsitassarsiorniarnerup ineriartornera kigaalaquserneqassasoq erseqqissaatigaa. Aatsitassarsiornermik pilersaarutit amerlanertigut ukiorpassuarnik sivisussuseqartarput, taamaammat piumasaqaatit allanngortinneqakulappata suliaqarniarneq ajornakusuussaaq.
Taamaammat soqutiginaataarukkiartorneq muminganut saatsinneqassappat suliamik isumaginninnermi sukkassuseq allannguiffiusariaqartoq, Kuupik V. Kleist isumaqarpoq.
Immaqa akeqqatut isigivallaarnagit kisianni aningaasarsiornikkut qaffassaanissaq aammalu suliffinnik pilersitsinissaq siunertareqatigiiffigigaanni taava suleqatigiinnerusoqartariaqarpoq, aammalu allaffissornikkut sukkanerusumik suleriartoqartariaqarluni aalajangigassat eqqarsaatigalugit..
Canadami nunarsuarmi aatsitassarsiorneq pillugu nittarsaassinerit annersaat sapaatiuppat allartippat aatsitassaqarnermut Naalakkersuisoq, Erik Jensen (S) kalaallit suliffeqarfii, danskit nukissiutinut pilersuinermullu ministeriat kiisalu Kunngissaq Frederik peqataassapput.
