Kuupik V. Kleist: Sanngiinnerusutut inissisimalerpugut
- Apeqquterujussuuvoq ilumut nukittoriartumik inissinnersugut, peqataajumajunnaarnerup kingorna taamatut isumaqatigiinniarnerit inernerat eqqarsaatigalugu. Aamma isumaqarpunga svenskit siulittaasuuffimmik ingerlatsilernerat sioqqullugu pissutsinut naleqqiutissagaanni taava Nunarput taamanikkumut naleqqiullugu sanngiinnerusumik massakkut inissisimasoq, Inuit Ataqatigiit siulittaasuat Kuupik V. Kleist oqarpoq.
Canada Issittumi Siunnersuisoqatigiinni maanna siulittaasuutitaqarpoq, Canadamiullu isumaqatigiissuteqarfigineqarnerisigut Kalaallit Nunaat Issittumi Siunnersuisoqatigiinni sulinermut peqataaqqilersoq, Naalakkersuisut siulittaasuata Aleqa Hammondip ippassaq nalunaarutigaa.
Nunatta nunatsinnut tunngasunut Issittumi Siunnersuisoqatigiinni isumaqatigiinniarnernut peqataasinnaalernissaa Namminersorneq pillugu inatsisip 2009-mi atuutilersup ammaassiffigaa, Nunatsinnullu tunngatillugu tamanna ajugaanerusoq, Naalakkersuisut siulittaasuata Aleqa Hammondip oqaatigaa:
- Isumaqarpunga ajugaanerput uaniittoq siuliani naleqqiullugu, maannakkumullu naleqqiullugu kalaallit uagut susassaqarfigut pineqartillugit allat, soorlu qallunaat Savalimmiormiulluunniit uagut sinnerluta oqalussinnaajunnaarput, uagut nammineq oqaasissaqarfigut nammineerluta isumaqatigiinniutigissavavut. Angusaq taanna angisoorujussuuvoq, aamma isumaqarpunga kalaallit kissaataannut ataqqinninnerusoq, Aleqa Hammond oqarpoq.
Naallu Nunatta Issittumi Siunnersoqatigiinni sulinermut peqataaqqilernera nuannaarutissatut Kuupik V. Kleistip isigigaluaraa, Nunatta Issittumi Siunnersuisoqatigiinni inissisimanera oqallisigineqartariaqartoq Kuupik V. Kleistip oqaatigaa:
- Canadamiut siulittaasoqarfittut kisimik isumaqatigiinniarfigineqarsimapput, unalu apeqqut aallaqqaataaniilli imatut isumaqarfigaara Issittumi Siunnersuisoqatigiit ataatsimoorneranni oqallisigineqartariaqartoq, mattulluni pinnagu. Kisiannili Issittumi Siunnersuisoqatigiit ataatsimut eqqarsaatigalugit, Inuit Ataqatigiit siulittaasuat Kuupik V. Kleist oqarpoq.
Sverigep Issittumi Siunnersuisioqatigiit siulittaasoqarfianik tigumminnittuunerani Kalaallit Nunaata Savalimmiullu isumaqatiginniarnerni peqataasannginnissaat 2011-miilli aalajangiusimaneqarpoq, tamannalu pissutigalugu Naalakkersuisut ataatsimiinnissami peqataannginnissaq ukioq manna maajip ulluisa 14-ianni aalajangerpaat.
Kalaallit Nunaata Issittumi Siunnersuisoqatigiinni sulinermut peqataaleqqinnera statsministeri Helle Thorning-Schmidtip nuannaarutigaa.
- Issittumi Siunnersuisoqatigiinni sulinerup ingerlateqqinneqarnissaa sammisassatsinnut ilaappuit, Helle Thorning-Schmidt ilaatigut allappoq.
