Kuupik V. Kleist: Aningaasaqarnikkut nalunaarusiaq tukappallaarpoq.

Aningaasaqarnermut Naalakkersuisup saqqummiussaa Kuupik V. Kleistip isornartorsiorpaa.

- Aningaasaqarnikkut ingerlatsineq pillugu ukiumoortumik nalunaarut 2014-moortoq tukangaatsiartoq isumaqarpunga. allaffissornikkut suliat akuleriisinneqartupilussuugamik, soorlu suut maani allaffeqarfissuarmi pitsanngorsartariaqarnersut, taavalu illuatungaani aamma naalakkersuinikkut siulittuinerit, ukiuni aggersuni qanoq ingerlasoqarumaarneranik neriuutigineqartut saqqummiunneqarput. Annertunerpaamik aatsitassarsiornermut uuliasiornermullu tunngassutillit saqqummiussuunneqarput, Kuupik V. Kleist oqarpoq.

Taanna isumaqarpoq suliffissaaleqineq ajornartorsiutaasoq sammineqanngippallaartoq. Massakkut nunatsinni suliffissaaleqisut 5000-it missaanniipput, siusinaartumillu utoqqalinersiallit 3000-it missaaniillutik. Nunatsinniillu aallararsimasut eqqaaneqannginneri isornartorsiorpaa.

- Taaneqanngillalluunniit nunatsinninngaanniit aallarartut. Inussuit 10.000-it pallillugit sulilersinneqarsinnaanngippata, ullumikkut pissutsit eqqarsaatigalugit  ajornartorsiut angisoorujussuaq isiginngitsuusaarneqartutut oqaatigineqartariaqassaaq, Inatsisartuni ilaasortaq Inuit Ataqatigiinneersoq Kuupik V. Kleist oqarpoq.

Taanna isumaqarpoq utoqqaat amerliartorneranni aningaasartuutit amerliartussasut, taamaattumik inuusuttunik suiunnersuisarnissaq pisariaqarsoraa. Inuusuttut pilersuisussatut inissittussaammata.

- Isumaqarpunga pingaartumik inuusuttut, siunnersorneqarnerat immikkut isigineqartariaqartoq. Suliniutinilu pingaarnerpaajutinneqartariaqartoq. Inuusuttut suliffeqanngitsut, aammalu ilinniagaqarsimanngitsut naatsorsuutigivagut ukiuni aggersuni utoqqaat amerliartupallanneranni pisortaniit pilersorneqartussat amerliartornerisa nalaanni taakkussuuttssaasut suliffeqarnermikkut aningaasarsiornermikkullu isumaginnittussatut.

Kuupik V. Kleist aamma isumaqarpoq inuusuttuaqqat siunissamut naatsorsuutigineqartut aallaqqaataaniilli ataasiakkaarlugit malinnaaffigineqartariaqartut aamma ilinnialeqqinnissaannik suliffissaqarnissaannillu aqqutissiuunneqarluartariaqartut. Taamaaliornikkut inuusuttuaqqanik malinnaanermi siunnersuinermilu suliffissanik ulikkaartoq isumaqarpoq. Siunissamilu imminut akilersinnaasoq.

- Immaqa massakkut akisusinnaagaluarpoq. Kisianni siunissami inuppassuit taakkua sulilersinnaanngikkutsigit, taavalu suliffissanik nutaanik pilersitsisoqaraluarpat, taava taakkua suliffissat immaqa aatsaat avataaninngaanniit tikisitsilluni aatsaat inuttalerneqartussaassapput.

Kuupik V. Kleist taama oqarpoq. Taanna aamma isumaqarpoq utoqqalinersiaqartartut ukiui amerlineqarnissaanik isumaq ajunngitsuusoq. Ukiut arlalialunnguit utoqqaat ilaat imminut napatissinnaammata.