Kuupik tunuarpoq

Taama nalunaarput tamassumunnga qanittumik ilisimanittut. Inuit Ataqatigiit tusagassiortunik ullumi aggersaapput. Kuupik V. Kleist-ip aatsaaqinnaaq oqaatigaa Inatsisartuni ilaasortaaginnassalluni.

- Inuit Ataqatigiit siulittaasuattut tunuarnissara aalajangiuppara, ukiuni 30-ni partiimi sulereerlungalu, tusagassiutinut nalunaarummini naatsumi, Kuupik V. Kleist taama allappoq.

Taassuma ukiut qulikkaat kingullit eqqarsaatigalugit aamma allappoq, Inuit Ataqatigiit partiinngorsimasoq Nunatsinni annerpaanut ilaalerluni, folketingimi ilaasortaatitaqalersimasoq aamma Naalakkersuisut siulittaasuuffigisimagaat.

- Nunarput eqqarsaatigalugu aammalumi partii Inuit Ataqatigiit eqqarsaatigalugit, politikkikkut ineriartorneq ukiuni kingullerni aqqusaarsimavarput. Ilaatigut aqqusaarsimavagut Nunatsinni politikkikkut allanngorarnerit, tamakkulu Inuit Ataqatigiit piareerfigiuassagaat kissaatigaara aamma aalajangiussisarnissat pisariaqarluinnartussat isigineqartarnissaat kissaatigalugu, Kuupik V. Kleist oqarpoq naatsorsuutiginerarlugulu partii inunnik piumassuseqarluartunit maanna ingerlanneqalissasoq.

Qallunaat aviisianni, Berlingske-mi allaaserineqarsimasoq ulluni kingullerni ussatigineqarluartoq, pillugu tunuarani Kuupik V. Kleistip aamma oqaatigaa.

- Maanna pisoq aviisillu allaaserisaa nalaatsornerinnakkut ataatsikkut pisuusipput, tassami tunuarnissannut kissaateqarnera, Inuit Ataqatigiit siulersuisuinut nalunaarutigaara sapaatip akunneri marluk matuma siornali aamma nalunaarutigalugu, Inuit Ataqatigiit inuusuttaat maanna piareersalereertariaqartut ingerlatitseqqinnissaminnut, Kuupik V. Kleist oqarpoq.

Inuit Ataqatigiit immikkut ittumik ataatsimeersuarnissaata tungaanut, tassa maajip 30-anni pisussami, siulittaasuugallassaaq Inatsisartunut ilaasortaq, Aqqaluaq B. Egede, taassumalu maanna suliassa pingaarneq tassaalerpoq, Inuit Ataqatigiit immikkut ittumik ataatsimeersuarnissaata piareersarnissaa.

Ataatsimeersuarnermi kina siulittaasutut piukkunneqarnersoq, suli ilisimaneqanngilaq.

- Ataatsimeersuaqataasunit siulittaasussatut kina piukkunneqarnersoq aalajangerneqassaaq. Siulittaasussatulli piukkunnartut amerlapput, Aqqaluaq B. Egede oqarpoq.

Sara Olsvig-p oqaatigaa, siulittaasussatut qinigassanngortissinnaalluni, oqaatigaluguli suli tamanna aalajangiutivinnginnamiuk.

Aamma Juliane Henningsenip Aqqaluaq B. Egede-llu siulittaasunngornissamik eqqarsaat isumaliutigaat.

Inuit Ataqatigiit partiiata oqaluttuarisaanerani siullermeersumik, siulersuisut siulittaasussamik immikkut piukkussaqanngillat.

Pisoq pillugu KNR.gl malinnaassaaq.