Kuupik: Tunuarninnut suliffeqarfiga attuumassuteqanngilaq
- Uanga nammineq Inuit Ataqatigiinni siulittaasunngoqqaarninnili oqaatiginikuusara massakkut piviusunngortippara. Tassalu suliassatut pingaarnerpaatut isigalugu kinguaariit nikittarniaqarnerat Inuit Ataqatigiinni Taavalu misigisimavunga suliassaq naammassisimallugu ajunngitsumik, Kuupik V. Kleist taama oqarpoq.
Inuit Ataqatigiit ullaaq tusagassiortunik katersortitsipput. Kuupik Kleistip tunuarnissaminut ulluliussaa nalaatsornerinnarmi aalajangerneqarsimasoq oqaatigaa. Partii majip ulluisa 30-ani ataatsimeersuarsaaq, tassanilu kina partiip siulittaasunngussanersoq aalajangerneqassaaq.
Kuupi V. Kleistip tusagassiortunik katersortitsigami erseqissarpaa nammineq tunuarnissani aalajangersimallugu.
Inuit Ataqatigiit siulittaasuat, Kuupik V. Kleist, politikeritut sulinermi saniatigut aningaasaliisartut piginneqatigiiffiillu nunani allanneersut nunatsinni uuliasiornermi aatsitassasiornermilu suliaqarnissamik aamma attaveqarnermi atortunik inissianillu sanaartornissamik soqutigisaqartunik siunnersuisalerniartoq, aviisimi Berlingske Businessimi allaaserineqarsimavoq. Tamanna peqqutaanersoq aperaarput.
-Immaqa piffissamik nalaatsornerinnakkut ataatsikkoortitsineruvoq taanna. Uannut imatorujussuaq sunniuteqanngilaq. Taamatut tusagassiorfiit saqqummiussuinerat, aamma tunngavissaasuanarpoq annertuallaartumik isumalersussallugu tamanna, Kuupik V. Kleist oqarpoq
Inuit Ataqatigiinnit siulersuisuni ilaasortaq. Aqqaluaq B. Egede siulittaasuugallartussasut inissinneqarpoq. Maajip ulluisa 30-ni kina siulittaasunngussanersoq qinerneqassaaq.