Kuupik: Politikkikkut sulineq tukassimaqaaq
- Uagut ukiuni sisamani ingerlatsisimanerput naliliiffigissagaanni isumaqarpunga pisariaqavissortumik torersaanerujussuaq ingerlassimagipput, aammalu aalajangersakkat allatut ajornartumik ingerlattariaqarsimasagut inunnit tamatigut nuannarineqarujussuannginnerat taanna ilisimavarput, taamaattumik pissutsit ullumikkut taamaapput, Inuit Ataqatigiit siulittaasuat Kuupik Kleist oqarpoq.
Nunatta aningaasarsiornikkut ineriartortinneqarnissaa qulakkeerneqassappat aalisarneq, takornarniartitsisarneq, inuussutissarsiutitigullu piorsaasoqarnissaa, aatsitassarsiornerullu pimoorunneqarnissaa pingaaruteqartut, Naalakkersuisut siulittaasuata Aleqa Hammondip tallimanngormat oqaatigaa.
Aalisarnermili periarfissat tamakkiusavillugit ullumikkut atorneqartut, Kuupik Kleistip oqaatigaa, immaminngaanniillu qaqinneqarsinnaasut annertusaaffigineqarsinnaanissaat piviusorsiunngitsutut isigalugit:
- Inuussutissarsiutinik nutaanik aammalu inuussutissarsiutinik aallartitsinissamut periarfissat atugassarititaasullu patajaatsut tassa pisariaqartitavut. Nutaanik pilersitsisoqartariaqarpoq suliffissaaleqinerujussuaq annikillisarneqassappat, Kuupik Kleist oqarpoq.
Inatsisartunut ullumikkut qinersisoqartuuppat Inuit Ataqatigiit Demokraatillu amerlanerussuteqarlutik Naalakkersuisuutitaqalersinnaassagaluartut, Sermitsiap inunnik ukiaq isumasiuinerata takutippaa.
Inatsisartunullu upernaaq qinersisoqareernerup kingorna naalakkersuinikkut pissutsit ukioq manna tukattuussimanerannut tamanna aamma takussutissaasoq, Kuupik Kleistip oqaatigaa:
- Taassuma isumaqarpunga takutikkaa pissutsit paatsiveerussimaarnermik nassataqartut, paatsiveerusimaarujussuartoqartoq aamma qinersisartut akornanni. Sammivik suna sammiviginiarneqarnersoq aammalu ingerlatseriaaseq eqqarsaatigalugu tukattoqarnera taamatut isumaqarpunga takussutissinneqartoq, Inuit Ataqatigiit siulittaasuat oqarpoq.
Kalaallit Nunaata nunarsuarmioqatigiinnut piffissami kingullermi saqqumilaarnerulersimanera, Aleqa Hammondip ukiumut qaangiutilersumut atatillugu naliliinermini ilaatigut oqaatigaa, Nunattali saqqumilaarnerulersimanerata tunuliaqutai allarluinnaasut, Kuupik Kleistip oqaatigaa:
- Tusaamanerlugaaneq annertooq pisimavoq qaammatini qaangiuttuni. Qallunaat oqariaasiat: Ajortumik eqqartorneqarneq, eqqartorneqanngilluinnarnerminngaanniit pitsaaneruvoq. Naluara taanna atuutsinneqarsimanersoq uani taamatut oqaaseqaateqarnermi, kisianni saqqumilaarsimaneq pissutsit isornartut tunliaqutaralugit saqqumilaartoqarsimavoq annertuumik, Inuit Ataqatigiit siulittaasuat Kuupik Kleist oqarpoq.
Taanna aamma isumaqarpoq Naalakkersuisut siulittaasuat Aleqa Hammond, naalakkersuisuni kisimiilluni saqqumilaartuusoq:
- Naalakkersuisuni ilaasortat sinneri annertunerusumik oqaaseqartitaaneq ajorput, Inatsisartuniluunniit oqallittoqaraluaraangat. Naalakkersuisut siulittaasuata oqallinnerit tamaasa akuliuffigisarpai, naak naalakkersuisuni ilaasortat allat akisussaaffigigaluaraat. Taamaattumik taanna saqqumilaarsimanermut tunngasoq assigiinngitsunik soorunami isumaqarfigineqartariaqarpoq, Kuupik V. Kleist oqarpoq.
