Kuupik Kleistip nunap inoqqaavisa pisinnaatitaaffii oqalugiaatigai
Immikkut paasisimasaqarfimmik taaneqartartoq tassaavoq suliniaqatigiiffik naalagaaffiit peqatigiit inuit pisinnaatitaaffii pillugit siunnersuisoqatigiivisa ataanni siorna pilersinneqartoq.
Kuupik Kleistip ilanngussamini erseqqissarpaa inuiaqatigiit inuit pisinnaatifaaffiisa ataanni kalaallit inuiattut akuerisaanerat tassungalu ilanngullugu nammineerlutik aalajangiisinnaalernerat, Kalaallit Nunaanni pinngortitami pisuussutinut pisinnaatitaalernerat kalaallillu oqaasiisa pisortatigoortumik oqaatsitut akuerineqarnerat killiffiusut pingaarutillit. Tamatumunga atatillugu aamma oqarpoq namminersorneq pillugu suliap ingerlanneqarnera, naak oqitsuinnaanngikkaluarluni, Kalaallit Nunaata Danmarkillu akornanni pissarsiviulluartumk pitsaasumillu oqaloqatigiittarnermik tunngaveqartoq.
-Nunarsuarmi oqariartuut nangeqqissallugu pingaarutilik, naak naalagaaffiit nunallu inutoqaasa kiisalu inuit pisinnaatitaaffiinut ataqqinninnerup akornanni attuumassutillit tamatigut pitsaasuusanngikkaluartut, Kuupik Kleist erseqqissaavoq. Taassuma aamma neriuutigaa kalaallit suliamik ingerlatsinerannit misilittakkat nunarsuarmi nunap inoqqaavisa oqartussaanerulernissaminnik aammalu inuiattut ineriartornissaminnik sorsuutiginninnerminni isumassarsiorfigisinnaagaat.