Kuupik Kleist: Tutsuiginassuserput Københavnimi uppernarsassavarput
Taamaammat nunanut tamalaanut isumaqatigiissusiorsinnaasutut tutsuiginassuserput apeqquserneqarsinnaasoq, Naalakkersuisut siulittaasuata nassuerutigaa.
Kyotomi isumaqatigiissummik Danmarkip paasinninnera ilumoorpat, taava Nunarput CO2-mik aniatitsinerminik 8 procentimik millisaanissaminik kinguaattoqqavoq. Nunatta paasinninnera ilumoorpat, taava millisaaniarluta iliuuseqanngippallaarsimassaagut.
Tassalu kinaluunniit ilumoorsimagaluarpat, Nunarput nunanut tamalaanut isumaqatigiissumminik naammassinnissimanngilaq. Tamannalu ajornartorsiutaasoq, Kuupik Kleistip nassuerutigaa.
- Nunanut allanut isumaqatigiissutigineqartut imaluunniit nunat tamalaat akornanni isumaqatigiissutigineqartut atsiussallugit imaannaangitsuuvoq. Imaanngilaq atsioraanni, isumaqatigiissimaneq aqagukkut puigorlugu pissusilersortoqarsinnaasoq. Isumaqatigiissutit pisussaaffiliipput, Kuupik Kleist oqarpoq.
CO2-mik aniatitatta 8 procentimik millinissaannik uatsinnut pisussaaffiliussaq naammassisinnaanngikkipput paasinarsineranit ukiup affaa qaangiummat, Kyotomi isumaqatigiisummik allaanerusumik paasinnilernerput saqqummerpoq.
Isumaqatigiissutissami, Københavnimi atsiorneqartussami, Nunatsinni CO2-mik aniatitsinerup 5 procentimik millilernissaanik pisussaaffilernissaq, Nunatta siunniuppaa.
Kisianni pisussaaffiliussatsinnik paasininnerput allanngortittarutsigu, Nunarput nunani tamalaani tutsuigineqarsinnaava?
- Nunat tamalaat akornanni isumaqatigiinniarnissat tungaannut danskillu isumaqatigiinniarnitsinni uagut mianersortorujussuuvugut. Allakkat, anguniagassanik piviusorsiortunik naammassisinnaasatsitullu isigisatsinnik aalajangersuiffiusut, sila pillugu danskit ministeriannut ippassaq nassiuppagut. Tassalu Københavnimi decembarimi isumaqatigiissusiortoqassappat, uagut tunngavigut aallaavigalugit ilaasinnaanissarput piviusorsiortuusoq, aammalu avatangiisinut tunngasuni siunissami anguniagassagut piviusorsiortuusut, uagut isumaqarpugut. Kuupik Kleist oqarpoq.
Nunatsinni naliginnaasumik atuisut CO2-mik 2007-mi aniatitaat aallaavigalugu 2020-ip tungaanut 5 procentimik millilerinissamik pisussaaffiliissasugut, Nunat tamalaat Københavnimi isumaqatigiinniarnissaanni Nunatta anguniarniarpaa.
Aatsitassarsiornermi suliffeqarfissarsuarnilu innaallagiartornartuni CO2-mik aniatitatta millilernissaanik pisussaaffilerneqarusunngilavut, taamaammallu silap allanngoriartornera pakkersimaarniarlugu iliuussissatut isumaqatigiissutissami ilaatinneqassanngitsoq siunniullutigu.
