Kuupik Kleist: Nunatta pisariaqartitai tusarneqarput
- Nunatta aningaasarsiornikkut suliffissuaqarnikkullu siunissami ineriartorsinnaaneranut periarfissat oqaloqatigiinnitsinni qitiulluinnarput. Nunarput aningasarsiornikkut ineriartornissamut mattunneqassanngitsoq, uagut saqqummiupparput, Kuupik Kleist oqarpoq.
Naalakkersuisut siulittasuat naliliivoq, silap pissusaanut tunngasut ministerimik kingullermik atatsimeeqateqarnerminit alloriaqqissimallutik.
- Suliassat assigiinngitsut suut tullinnguunnersut isumaqatigiissutigaavut, Kuupik Kleist oqarpoq.
Erngup nukinga tunngavigalugu printiliorsinnaaneq suli ineriartortinneqartoq. Ataatsimeeqatigiittut isumaqatigiipput, tamatuminnga ilisimatusarneq teknikkikkullu ineriartortitsineq Nunatsinni ingerlanneqassasoq, tassalu ulluni aggersuni misissuifigineqassaaq, ineriartortitsineq qanoq aningaasalersorneqarsinnaanersoq.
Aamma erngup nukinganik atuilluni suliffissuaqarnermik ineriartortitsinermi assersuutigalugu aluminiuliorfimmik pilersitsinikkut, nunarsuarmioqatigiit ataatsimut isigalugit CO2-mik aniatsitsinerat millissasoq, Kuupik Kleistip silap pissusianut tunngasunut danskit ministeriannut saqqummiussimavaa.
- CO2-milluunniit annnertunerusumik aniatitsileraluarutta, erngup nukinganik tunnganeqarluni suliffissuarnik ingerlatsineq tassaassoq, Nunarsuaq ataatsimut isigalugu CO2 minnerusumik aniatitsilerneq, Naalakkersuisut siulittasuat tikkuaavoq.
Kisianni tassa Nunatta CO2-mi annerusumik aniatitsilersinnaanissaa Connie Hedegaardimik ataatsimeeqateqarnermi qularnaarneqanngilaq. Naalakkersuisulli siulittaasuat suli isumalluarpoq.
- Oqartoqarsinnaavoq, periarfissaq taanna mattunneqanngitsoq. Aamma Nunatta aningaasarsiornikkut ineriartornissaanik periarfissiisariaqarneq ammaffigineqarpoq paasineqarluinilu. Tassalu qanorpiaq ilusilimik isumaqatigiissuteqassanerluta qaammatini marlussunni tullerni suliarisavarput, Kupiik Kleist oqarpoq.
