Kuupik Kleist: Naalakkersuisut iliuuseqanngippallaarsimapput

Royal Greenland 2 milliardit koruunit angullugit akiitsoqarpoq, aningaasarsiornikkullu ajornartorsiorneq pissutigalugu, akiligassaqarfigineqartut maanna qisuariartalerput.

Taamaattumik naalakkersuisunngortussat Royal Greenlandip miliiardit affaannik piaartumik qularnaveeqqusernissaa isumaqatigiissutigaat, Atassutip ingerlatseqatigiiffik ajutoorluinnalersutut tusagassiuutinut nalunaarutigereeraalu. Tamatumami kinguneranik akiligassaqarfiit allat toqqissisimajunnaarsinnaammata, naalakkersuisuni siulittaasunngortussaq aviisimut taama nassuiaavoq.

- Piaartumik iliuuseqarnissarput pisariaqarsimavoq, aningaasaliisarfiit Royal Greenlandimit akiligassaqarfigineqartut aningaasat pisassatik uivilerlutik tigujumaleqinammatigik, Kuupik Kleist oqarpoq, naalakkersuisuusimasullu iliuuseqanngippallaarnerarlugit isornartorsiorlugit.

- Aningaasarsiornikkut ajornartorsiorneq isiginiarneqarpallaarsimanngilaq. Taamaattorli piffissap qanoq ilinerani kikkut qanoq ilisimasaqarsimanersut, kikkullu iliuuseqanngippallaarsimanersut erseqqarluppoq.

Royal Greenlandilu ajutuulernersoq apeqqutigineqarmat ima akivoq:

- Taama pisoqassappat tamanna nammassinnaanngilarput, Naalakkersuisuni siulittaasunngortussaq oqarpoq, Namminersornerullutillu Oqartussat suliffiutaat allat misissuiffigeqqissaartariaqarsinnaasut oqaatigalugu. Taakkuli sorliunersut oqaatigumanngilai.