Kuupik Kleist: Isertuussamik isumaqatigiissuteqartoqanngilaq
Kalaallit Nunaat Danmarkimik taamatut isumaqatigiissuteqarnissaminik pilersaaruteqanngilaq. Taamatut isumaqatigiissuteqarusuttoqarsimaneraluunniit Kuupik Kleistip tusaarusunngilaa. Kalaallit Nunaanni aatsitassat Kalaallit Nunaata pigai, taakkualu qanoq atorneqarnissaat Kalaallit Nunaannit aalajangerneqassaaq.
- ”Paasissutisseeqatigiinnerit kiisalu Danmarkimi Nunatsinnilu Naalakkersuisut akornanni nunanut allanut kiisalu illersornissamut tunngasut patajaallisarnissaat” pillugu allaffissornikkut isumaqatigiissuteqarnissaq pillugu siornali sulissuteqartoqarnera ilumoorpoq. Allaffissornikkut isumaqatigiissuteqarnissaq pillugu Inatsisartut tamatigut ilisimatinneqartarput, minnerunngitsumik 2012-imi novembarimi Nunanut Allanut politikkikkut Qulaajaaneq pillugu uanga saqqummiininni suleqatigiinnissamik isumaqatigiissut pillugu Inatsisartut paasissutissinneqartarput, Naalakkersuisut siulittaasuat oqarpoq.
Issittup nunanit tamanit soqutigineqariartuinnarnera eqqarsaatigalugu kiisalu naalakkersuisooqatigiit, avataaniit ikiorserneqarlutik, aningaasaqarnikkut politikkikkullu Kalaallit Nunaata pituttorsimajunnaarnissaannik sulissuteqarneranni Kalaallit Nunaata nunanik tamanik isumasioqateqartarnissaa pisariaqarluinnarpoq. Kalaallit Nunaannut Issittumullu tunngassutilinni Kalaallit Nunaata akuliuttarnissaata qulakkeernisssaa pingaarluinnarpoq. Tamannaana anguniarlugu, qallunaat nunanut allanut ministereqarfiata Namminersorlutillu Oqartussat paasissutisseeqatigiittarnissaat ataqatigiissaarisoqartarnissaalu patajaallisarneqartariaqartut.
- Nunanut allanut atatillugu soqutigisatta allanit isumagineqartarneri naammagiinnarsinnaanngilarput, Kalaallit Nunaata Danmarkillu avataani nunarsuarmioqatigiit akornanni pissutsit isummersorfigisinnaasariaqarpagut. Nunat allat niuerfigeqatiginiarneranni aaqqiagiinnginnerit, sorsuunnerit pissutsillu allat isummerfigisariaqarpagut, Kuupik Kleist nassuiaavoq.
