Kuupik Kleist: Haitip inui misiginneqatigaavut
Haitimi makititseqqinniarnermut atugassanik Kalaallit Røde Korsiata katersuiniarnera Namminersorlutik Oqartussanit tapersersorneqassaaq, kisianni tapersersuineq qanoq ittuussanersoq suli aalajangerneqanngilaq.
- Misiginneqataanerput soorunami qularutissaanngilaq, aamma isumaqarpunga Nunatsinni inuit sinnerlugit taamatut oqarsinnaallunga. Naalakkersuisuniit Haitip inuinut misiginneqataanermik nalunaaruterput aqagu nassiutissavarput, Kuupik Kleist, oqarpoq.
Ajunaarnersuarmut eqqugaasunut ikiuiniarnermi Kalaallit Røde Korsiata katersuiniarnera arlaatigut tapersersorneqassasoq, Naalakkersuisut ullaaq ataatsimiikkamik isumaqatigiissutigisimavaat. Tamatumunngalu atatillugu, Kalaallit Røde Korsiat, Tove Blidorf, Kuupik Kleistip ullumi oqaloqatigisimavaa.
Kalaallit Røde Korsiata siornatigut katersuiniarnermini isertitattagai naalakkersuisut siuliinit marloriaatinngortinneqartarput.
- Tamanna periarfissanut ilaavoq. Imaassinnaavorli allatut iliuuseqartugut. Suli erseqqissumik aalajangiinnngilagut. Paasivara, ajungaarnersuup ulluini siullerni ikiuiniutinut Nunatsinniit peqataasinngitsugut. Kisianni qaammatini aggersuni suliassarpassuit takkussuuttussaapput. Nunap makiteqqinniarnissaa suliassani immaqa annerpaassaaq. Tassanilu Kalaallit Røde Korsiata aningaasalersuinermut peqataanissaq siunertarivaa, uagullu Naalakkersuisuni tassani peqataanissarput naatsorsuutigaarput, Kuupik Kleist, oqarpoq.