Kuupik Kleist: EU-mut isumaqatigiissutit nalileqqittariaqarput

Kuupik Kleist ullaap tungaani tusagassiortunik katersortitsigami oqarpoq, EU-mi atatsimeeqatiginnissalluni, tamannalu pissasoq Nunat Avannarliit siunnersuisoqatigiivisa oktobarip 26-aniit atatsimiinnissaannut peqataajartornerminut atatillugu.

- Puisit amiinik puisinillu tunisassianik eqqusseqqusiunnaarneq oqaluuserissavarput. Kingullertullu raajanik akitsuuteqanngitsunik nunat allat EU-mut tunisisinnaalernissaat, uagut unamminnersinnaanitsinnik qarajaasutut isigaarput, taamaamallu EU-mut isumaqatigiissutigut oqimaaqatigiikkunnaariartorput. Tamakkualu EU kommissionimut EU Parlamentillu siulittaasuanut oqaloqatigiinnissutigissavakka, Kuupik Kleist oqarpoq.

EU-mut raajanik eqqussuinermi akitsuutigititanik appaanissamut EU-mut ilaasortat amerlanerussuteqarluartut isumaqataapput, Kuupik Kleistillu ilimagaa, EU-mi pisisartut raajanik akikitsunik pisiassaqarnissaat tassani siunertaasoq. Taamaammat Kuupik Kleistip ilimaginngilaa, taama aalajangernissaq pingitsoortinneqarsinnaasoq. Kisianni Nunatta EU-mut isumaqatigiissutai assigiinngitsut aalisarnermut isumaqatigiissutitoqqamit aallaaveqarput.

Taamaammat Kuupik Kleist isumaqarpoq, EU Kommissionimik oqaloqatiginnileruni, aalisarneq qitiusorujussussaasoq.

- EU-p nunatta imartaani aalisagartassinneqartarnerminut soqutigisai aallaaviusinnapput. Kisianni ataatsimut isigalugu ukiuni kingulliunerusuni EU-miit iliuuserineqartartut assigiinngitsut nunatsinut iluaqutaasimanngillat, taamaattumillu isumaqatigiissutigut eqqartoqqinneqartariaqarput, Kuupik Kleist oqarpoq.

EU-mut raajanik eqqussuinermi akitsuutinik appaaniarneq Danmarkip isumaqatigaa.