Kuupik Kleist: Ataatsimoorussanik isumaqatigiissusiortoqarsinnaavoq

Nunatta aalisarneq pillugu EU-mut isumaqatigiissutaa matumani nutarterneqarpoq, soorlu aamma suleqatigiissutissat assigiinngitsut, assersuutigalugu ilinniartitaanikkut suleqatigiissutissat isumaqatigiinniutigineqaleruttortut.

Allatulli aamma isumaqatigiissusiortoqarsinnaanissaa Nunatta kissaatigaa.

- Isumaqatigiissutit assigiinngiiaartut ataatsimoortillugit politikkikkut isumaqatigiissuteqarnissarput EU-mut saqqummiupparput kissaatigalugu. Imatut paasillugu: Kommissærit ataasiakkaat soorunami isumaqatigiinniarfigisussaavavut suliassat ataasiakkaat pillugit, kisianni EU-mi kommissionimik tamakkiisumik inatsisartuilu tamakkiisumik paasinnissappata, ataatsimoortumillu isummersinnaassappata, taava uagut isumaqarpugut naalakkersuinikkut qaffasinnerusumik isumaqatigiissuteqartariaqarluta isumaqatigiissutit taakkua tamarmik sinaakkusiorneqarsinnaanerat siunertaralugu, Naalakkersuisut siulittaasuat Kuupik Kleist oqarpoq.

Paatsoortoqannginnissaa anguniarlugu sammivik ataasiusoq siunertaralugu isumaqatigiissusiortoqartariaqartoq, Kuupik Kleistip Naalakkersuisut sinnerlugit kissaatigaa.

- EU aaqqissuussarujussuuvoq tuusintilikkaanik sulisulik. Taakku ataasiakkaarlutik immikkoorlutik isummersunnginnissaat anguniarlugu EU-p aaqqissuussaanerani qaffasinnerpaami isumaqatigiissusiornissarput kissaatigivarput, Kuupik Kleist oqarpoq.

Nunatta EU-llu akornanni isumaqatigiinniutigineqarsinnaasut nutaat, soorlu aatsitassarsiornikkut suleqatigiissutaasinnaasut isumaqatigiissusiorfigineqassappata, taamatut tamakkiisumik isumaqatigiissusiornissaq pingaaruteqartoq, Kuupik Kleistip oqaatigaa.

Taamatulli isumaqatigiissusiorneq Nunatsinnut iluaqutissartaqarpa? Naalakkersuisut siulittaasuat ima akivoq.

- Naalakkersuinikkut isumaqatigiissutit aallaaveqarput soorlu ilisimatusarnikkut suleqatigiissinnaanermik, avatangiisit illersorneqarsinnaanerannut tunngatillugu ilisimatusaqatigiinnermi, Nunatsinnilu innuttaasut aatsitassarsiornermi sulinissamut piukkunnarnerulernissaannut suliniutinut, Kuupik Kleist oqarpoq.

- Soorunalimi taamatut naalakkersuinikkut isumaqatigiissuteqassagutta, ilisimatuussutsikkut suleqatigiilluta, taava aamma ingerlatseqatigiiffiit selskabit aatsitassanik soqutigisallit Nunatsinnut soqutiginninnerulissapput, taamaalilluni EU-p pisariaqartitai immaqa taamaalillutik aaneqarsinnaallutik, Naalakkersuisut siulittaasuat Kuupik Kleist oqarpoq.

Nunatta EU-llu akornanni tamakkiisumik sinaakkusiisumillu qaammatialunnguit ingerlaneranni isumaqatigiissusiortoqarsinnaanissaa taassuma neriuutigaa.