Kuupik Kleist ataatsimiititaliarlu isumaqatigiinngillat
Kalaallit Nunaata siunissami nunanut allanut tunngasutigut periarfissaasa akornuserneqarsinnaanerat Naalakkersuisunit annilaanngatigineqarsimammat, CIA tigusanik angallassilluni Nunatsinni mittarfinnik atuisarsimanersoq sumulluunniit attuumassuteqanngitsunut misissortinneqassanersoq, Kuupik Kleistip Nunanut allanut Isumannaallisaanermullu ataatsimiititallu isumaqatigiinngissutigaat. Nunanut allanut Isumannaallisaanermullu ataatsimiititap Naalakkersuisullu isumaqatigiinnginnerat pissutigalugu, CIA pillugu sumulluunniit attuumassuteqanngitsunik misissuititsisinnaaneq qaammatit marluk sinnerlugit aalajangiiffigisinnaasimanngilaat. - Tassa ataatsimiititaliami pingaartutut isigisimavarput Nunatta ataatsimoortumik Inatsisartuninngaanniit Naalakkersuisuninngaanniillu kissaatigineqassasoq sumulluunniit attuumassuteqanngitsunik misissuititsineq pissasoq. Siullermik Naalakkersuisut siulittaasuata taanna malinniassallugu tunuarsimaarsimasorujussuuvoq, kisiannili ataatsimiititaliami uteqattaarluta aammalu pingaartorsiutigalugu qaqeqqittaqattaarnerani maannamut tassunga killissimavoq Naalakkersuisut Inatsisartut kissaataat malinniassallugu, Aleqa Hammond oqarpoq. Apeqqutip ataatsimiititami qaqeqattaarsimaneranut pissutaavoq Kuupik Kleistip misissuisoqarnissaanut isumaqataasimanngikkaluarnera. - Naalakkersuisut siulittaasuata siullermeertumik oqaatigigaluarpaa paasissutissanik nutaanik qaqitsisoqarnissaa ilimaginagu. Kisiannili ataatsimiititaliami pingaartutut isigisimavarput aatsaat misissuititsisoqareernerani nalilersinnaagipput Danmarkiminngaanniit naalagaaffeqatigiinnerup aqqani Nunatta qanoq atorneqarneranut piginnaatitsisoqarsimanersoq, kalaallit ilisimanngisaannik. Misissuititsereernerup kingorna aatsaat taanna takutissavaa, Aleqa Hammond oqarpoq. Aleqa Hammondip oqarnera naapertorlugu tassa paasissutissanik nutaanik qaqitsisoqarnissaa Kuupik Kleistip ilimagisimanngilaa. Kuupik Kleistilli taama toqqartigisumik oqaatigerusunngilaa, aalajangiiniapiloornermili Kalaallit Nunaanniit allatut iliuuseqarnissaq tunngavilersorsimanerarlugu: Misissuinerummi sivisuumik suliarineqariaannaasup ingerlanerani, Kalaallit Nunaata kissaataasa allat nunanut allanut tunngassuteqartut suliarineqannginnissaannut qallunaat utoqqatsissutissiinnarneqarsinnaammata. - Sumulluunniit attuumassuteqanngitsunik misissuititsisoqarnerani suliassat allat unitsikkallarneqarsinnaapput, Kuupik Kleist oqarpoq, Kalaallit Nunaatalu qallunaat naalakkersuisui peqatigalugit taamatut pisoqartillugu iliuuserisassanik malittarisassiorusunnera eqqaallugu. Taamatut Kalaallit Nunaat siunissami isumannaannerusumik inississinnaammat. Taamaammat isumaqatigiinnginneq politikkikkut assigiingitsunik kissaateqarnermik aallaaveqanngilaq, nunanulli allanut tunngasutigut Kalaallit Nunaat sunniuteqarnerorusulluni qanoq Danmarkimut periuseqarnissaanik aallaaveqarluni. Ataatsimiititalialli siulittaasuata Justus Hansenip Demokraatineersup, misissuititsisoqarneratigut qallunaat paasissutissanik isertuussanik kalaallinut tunniussinissaat Kalaallit Nunaatalu namminersornerusinnaanera pinngitsaaliissutigineqarsinnaassasoq qularinngilaa. - Paasissutissanik uagutsinnut isertuussisoqarsimappat soorunami qallunat naalakkersuisui isorisariaqarpagut oqarfigalugillu, naalagaaffeqatigiikkatta taamatut pisoqartillugu tusarniaaffigineqartarnissarput piumasaralugu. Nunanut allanut tunngatillugu susassaqarfiit annikinnerusut annertunerusullu Nunatsinnit tigoorarneqalernissaat taamatut iliornikkut aqqutissiuunneqarsinaasoq uanga ilimagaara, Nunanut allanut Isumannaallisaanermullu ataatsimiititami siulittaasoq, Justus Hansen Demokraatineersoq oqarpoq.
