Kuupik Kleist: Arktisk Kommando Nuummut inissilli
Sakkutooqarfiup sumiinnissaa, Naalakkersuisut siulittaasuata Kuupik Kleistip qularutiginngilaa:
- Uagut soqutigisaraarput, Arktisk Kommandop Nunatsinniisinneqarnissaa. Aalborgimiinnani, Kisiannili Nunatsinniilluni, Kuupik Kleist oqarpoq.
Kangilinnguani sakkutooqarfik aamma savalimmiuni sakkutooqarfik ataatsimuulersinneqarunik Arktisk Kommandonngussapput. Nunatta imartaanut tamakkiisumik oqartussaassuseqarneq Arktisk Kommandop takutittassavaa.
Aalborg, Kangilinnguit Nuulluunniit inissiivissatut maannaisumaliutigineqarput. Suleqatigiissitanik pilersitsisoqarsimavoq, taakkualu Arktisk Kommandop sumiilernissanik ukiortaartinnagu siunnersuuteqassapput.
Kangilinnguani maanna sakkutooqarfiususoq sakkutuunik 60-inik maanna sulisoqarpoq. Arktisk Kommandop pilersinneqarnissaa, illersornissaq pillugu Folketingimi isumaqatigiissummi 2009-meersumi ilaavoq.
Illersornissaqarfik aningaasaliissutinik 2008-mi 2009-milu milliardi koruunit sinnerlugit sippuereerluni, 4 milliardi koruunit tikillugit sipaarniartussaavoq.
- Taamaattumik illoqarfimmut allamut inissiffissarsiorneqarpoq, massakkullu Nuuk nuuffissatut pilerigineqarluni, Kuupik Kleist nangippoq.
Tassalu immikkut ingerlatsineq akisummat, innaallagissiorfimmik, atuarfimmik illoqarfimmilu pisariaqartitanik allanik tamarmik peqareertumut nuunnissaq pilerigineqartoq, Kuupik Kleist oqaluttuarpoq.