Kuupik: INI suli namminiilissanngilaq!
Inissiaatileqatigiiffiup A/S INI-p siulersuisuinut, Naalakkersuisut ukiut marluk matuma siorna neriorsuutaat tassaavoq, inissiaatileqatigiiffiup nammineerluni inissianik ingerlatsisunngorsinnaanera nalilersorneqassasoq. Ullorli manna tikillugu neriorsuutip piviusunngortinneqannginnera ilaatigut pissutigalugu, siulersuisuni siulittaasup, Erik Nørskovip qinerpaa siulersuisunit tunuarniarluni.
- Tusagassiorfitsigut Erik Nørskov oqaaseqarfiginagu oqaatigiinnarsinnaavara, inissianut akisussaaneq inissiaatileqatigiiffiup nammineq pigilernissaannut maanna piffissaanngimmat, Kuupik Kleist oqarpoq.
Inissiat kia akisussaaffigissanerai 2010-p kingorna nalilersuiffigineqartoq, Kuupik Kleistip aamma oqaatigaa, ilanngullugulu oqaatigalugu ingerlatseqatigiiffiup A/S INI-p ingerlatsinera pillugu taamani aamma mississuifigineqarmat.
- Taamanikkullu isummerneq unaavoq inissiat pigineqarnerat A/S INI-mut nuussallugu piffissaanngitsoq aammalu piginnittut suli tassaassasut Namminersorlutik Oqartussat, Kuupik Kleist oqarpoq.
Inissiaatileqatigiiffiup A/S INI-p siulersuisuisa, maanna atuukkunnaartut isornartorsiugaasa ilagaat, inissianut aserfallassimasunut aningaasartuutissat isaterinissanut aningaasartuutissanut nuunneqartarneri.
- Soorunami tamanna Naalakkersuiusnit maluginiarsimavarput aammalu nuannarineqarpallaanngikkaluartumik attartornermut akinik qaffaasarsimalluta, tamannalu pivoq aserfallatsaaliinermut aningaasassaqarniassagatta, ukiumoortumillu Inatsisartut aningaasanut inatsisaatigut tamanna aalajangerneqartarpoq, Kuupik Kleist oqarpoq.
- Inissiaatileqatigiiffiup inissiat pigigunikkit isumaqartoqarsinnaavoq immaqa allatut ingerlateriaaseqartoqassasoq, kisiannili ajornartorsiummut tunngaviulluinnartoq tassaavoq aningaasassaaleqisimaneq aammalu attartornermut akit ukiorpassuarni nikisinneqarsimannginnerat.
Inissiaatileqatigiiffiup A/S INI-p siulersuisuisa, maanna atuukkunnaartut marsip 23-anni ataatsimiinnerminni minuttinilu 22-ini sivisussusilimmi aalajangiuppaat, allanik taarserneqarnissartik, tamannalu pivoq KANUKOKA Naaminersorlutillu Oqartussat isumaqatigiissuteqarfiginerisigut.
- Attartortunut kiffartuussinerup pitsaanerulernissaa kissaataavoq erseqqissoq, taamaattumik neriuutigaarput siulersuisut nutaanngornerini aattartortut kiffartunneqarnerat pitsaanerulissasoq, Naalakkersuisut siulittaasuat, Kuupik Kleist oqarpoq.
- A/S INI-p aaqqissuunneqarnerata allanngoriartuaarnera aallartereersoq naammassineqassasoq neriuutigaarput, tamannalu kiffartuussinerup pitsanngoriarneranut aallarniutaassasoq aamma neriuutigalutigu, Kuupik Kleist oqarpoq.
Inissiaatileqatigiiffiup A/S INI-p nammineerluni inissianik akisussaafeqalernissaa, Naalakkersuisunit neriorsuutaasimasoq maanna suli piffissaanngitsoq, Naalakkersuisut siulittaasuata, Kuupik Kleistip oqaatigaa.
Inissiaatileqatigiiffiup A/S INI-p siulersuisuisa nutaatut siulittaasorilerpaat. inatsisileritooq Lissi Olsen. Ilaasortallu ilagaat Arctic Umiaq Line-p pisortaanera, Jette Larsen aamma suliffeqarfiup MT-Højgaardip pisortarisimasaa, Kristian May.
