Kuupik: Ecuadorimi periuseq orniginanngilaq
Kuupik Kleistip DR2 Deadlinemi apersorneqarnermini Ecuadorimi periuseq soqutiginartutut taavaa. Ecuadorimi naalakkersuisut Naalagaaffiillu Peqatigiit 2010-mi isumaqatigiissutaanni uuliap nalingata affaa, tassa 19-it milliardit koruunit, Ecuadorimut taarsiissutigineqarpoq.
Uuliamik maqisoortaqassagaluarpat avatangiisinik mingutsitsinissamut ernumanartortaqarnera peqqutigalugu uuliasiunnginnissamut isumaqatigiissut atsiorneqarpoq.
- Isuma tunngaviusumik ajunngitsuuvoq, Kuupik Kleist Kunngikkormiunik angalaqateqarluni Siorapalummiittoq ullaaq oqarpoq.
Avatangiisit illersorniarlugit taarsiissuteqarnissamut isuma soqutiginaateqaraluarluni eqqartorneqarnikuunngitsoq aamma saaffiginnissutigineqarnikuunngitsoq Kuupik Kleistip oqaatigaa. Aamma Naalakkersuisut taamatut pilersaaruteqanngitsut oqaatigalugu.
Uuliasiornerli namminerisamik aningaasarsiulernissamut ikaarsaarfiusoq Kuupik Kleistip taavaa. Ecuadorimilu periuseq atorneqalissagaluarpat, nunarput piumasaqaatitaqanngitsumik pilersorneqaannassasoq isumaqarluni.
- Taamaattumik periutsip taassuma nunatsinnut eqqunneqarnissaa Naalakkersuisut pilersaarutiginngilaat, Kuupik Kleist oqarpoq.
Ecuadorimi orpippassuaqarfiit uumasullu nungutaanissamut ulorianartorsiortut eqqorneqannginnissaat anguniarlugu Ecuadorimi naalakkersuisut Naalagaaffiillu Peqatigiit isumaqatigiissusiorput.
